Փորձել է լվացքը հավաքել, բայց հայտնվել ներքևի հարկի պատշգամբում. ՏԵՍԱՆՅՈՒԹ

Երեկ Երևանի Բագրատունյաց 10 հասցեում 5-րդ հարկի պատշգամբը փլուզվել էր այն պահին, երբ տան բնակիչը դուրս էր եկել լվացքը հավաքելու։ Նրա հարևանուհու խոսքով՝ ամեն ինչ այնքան հանկարծակի է տեղի ունեցել, որ կինը չի հասցրել վերադառնալ բնակարան։ 

Հարևանուհին պատմում է, որ պատշգամբում երկուսով են եղել․ մեկը գլխի վնասվածք է ստացել և տեղափոխվել հիվանդանոց։ Բարեբախտաբար, վնասվածքը ծանր չի եղել։ 

Վարձակալությամբ բնակվող կինն ընկել է մեկ հարկ՝ ներքևի բնակարանի պատշգամբ։ Բնակարանում այդ պահին ոչ ոք չի եղել, դուռը բացելու հնարավորություն չեն ունեցել։ Հարևանուհու խոսքով՝ կնոջը հազիվ են կարողացել դուրս բերել։ 

Բնակիչներն ասում են՝ խնդիրը համատարած է․ տարածքում բազմաթիվ շենքերի պատշգամբներ, ճակատային հատվածներ տարիների ընթացքում քայքայվել են և վտանգ են ներկայացնում իրենց համար։ Բագրատունյաց 10 հասցեի շենքը նույնպես հին է, իսկ փլուզված պատշգամբը, բնակիչների խոսքով, երբևէ չի վերանորոգվել։ Հարակից շենքերի բնակիչներն էլ մեզ հայտնեցին, որ դիմում են Երևանի քաղաքապետարան՝ խնդրելով թույլտվություն տրամադրել պատշգամբները վերանորոգելու համար, սակայն, նրանց պնդմամբ, ո՛չ համապատասխան թույլտվությունն են ստանում, ո՛չ էլ պատշգամբների վերանորոգման աշխատանքներ են իրականացվում։ Բանն այն է, որ բնակիչներն առանց համապատասխան թույլտվության իրավունք չունեն ինքնուրույն վերանորոգելու շենքերի արտաքին հատվածները։ 

Քաղաքապետի մամուլի քարտուղար Արտյոմ Կարապետյանը Factor TV-ին հայտնեց, որ տվյալ դեպքում թաղապետարանը պետք է նախագիծ ներկայացնի քաղաքապետարան, և ինքն էլ իրականացնի պատշգամբի վերականգնման աշխատանքները։ 

Բագրատունյաց 10 հասցեի շենքի բնակիչներից մեկը հիշում է նաև, որ հարևան շենքում նույնպես անցյալ տարի պատշգամբ էր փլուզվել։ Այդ դեպքում, նրա խոսքով, ոչ ոք չէր տուժել, իսկ փլուզված հատվածը հետագայում վերանորոգվել էր։ 

Այս դեպքից հետո հարևանները պահանջում են, որ պատշգամբների և բնակելի շենքերի վտանգավոր հատվածների խնդիրը չմնա միայն դժբախտ պատահարից հետո քննարկման թեմա։

Մանրամասները՝ տեսանյութում։

Արփի Հակոբյան