20.10.2026 | 18:01
Իրանի ԱԳՆ-ն արձագանքել է Ադրբեջանի դպրոցներում հիջաբի արգելքի խնդրին
«Մուլտի Տաբակ»-ը վերականգնել է պետությանը պատճառված ավելի քան 338 մլն դրամի վնասը
Հասարակություն
28.08.2026 | 15:46
Քննչական կոմիտեի տվյալներով՝ ծխախոտ արտադրող ընկերության պատասխանատու անձինք 2023-2024 թվականներին իրացրել են սպիտակ տուփերով և առանց մակնշման ծխախոտային արտադրանք։ Նախաքննության ընթացքում ընկերությունը հարկային մարմին է ներկայացրել ճշգրտված հաշվարկներ և վերականգնել պետությանը պատճառված 338 մլն 525 հազար դրամի վնասը։
Նշենք, որ վերանշյալ ծխախոտ արտադրող ընկերությունը Factor.am-ի տեղեկություններով, Գագիկ Ծառուկյանին պատկանող «Մուլտի Տաբակ»-ն է։
«ՀՀ քննչական կոմիտեի տնտեսական հանցագործությունների և մաքսանենգությունների քննության գլխավոր վարչությունում ծխախոտային արտադրատեսակների արտադրություն իրականացնող ընկերության կողմից առանձնապես խոշոր չափերով հարկեր չվճարելու դեպքի առթիվ քննվող քրեական վարույթով կատարված մեծածավալ քննչական և վարութային գործողությունների արդյունքում պարզվել և հիմնավորվել են ընկերության պատասխանատու անձանց կողմից 2023-2024 թվականների ընթացքում ՀՀ տարածքում սպիտակ տուփերով, առանց որևէ մակնշման ծխախոտային արտադրանքների իրացման դեպքեր:
Քրեական վարույթի նախաքննության ընթացքում ընկերության կողմից հարկային մարմին են ներկայացվել ճշգրտված հաշվարկներ, որոնց արդյունքում վերականգնվել է պետությանը պատճառված 338 մլն 525 հզր 74 ՀՀ դրամի չափով վնասը:
Նախաքննությունը շարունակվում է»,- ասված է ՀՀ քննչական կոմիտեի տարածած հաղորդագրությունում։
Նշենք, որ «Մուլտի Տաբակ»-ի 100% բաժնեմասը պատկանում է ԲՀԿ առաջնորդ Գագիկ Ծառուկյանին։ Դատախազությունը նրա դեմ ապօրինի գույքի բռնագանձման հայցով պահանջում է նաև 38 իրավաբանական անձանցում մասնակցության բռնագանձում, սակայն հրապարակված հաղորդագրությունում ընկերությունների ամբողջական ցանկը ներկայացված չէ։
