ԱԺ-ն հաստատեց Կառավարության ծրագրի փոփոխությունների վերաբերյալ օրենքների նախագծերի փաթեթը

Ազգային ժողովն ամբողջությամբ ընդունեց «Կառավարության կառուցվածքի և գործունեության մասին» ու կից օրենքներում փոփոխություններ նախատեսող օրենքների նախագծերի փաթեթը։ Ընդդիմությունը նախագծի երկրորդ ընթերցմանը կրկին դեմ քվեարկեց։

Նախագիծերի փաթեթն այսօր քննարկվում էր խորհրդարանում, այն ներկայացնում էր Արդարադատության նախարար Սրբուհի Գալյանը։

Նախ Սրբուհի Գալյանը ներկայացրեց երեք նախարարությունների անվանափոխության և գործառույթների վերանայման առաջարկը։ Առաջարկվում է վերանվանել Բարձր տեխնոլոգիական արդյունաբերության նախարարությունը՝ այն դարձնելով Բարձր տեխնոլոգիական արդյունաբերության և արհեստական բանականության նախարարություն։

Նախարարի հայտնեց, որ գործող օրենքում նախարարության պատասխանատվության ոլորտների թվում կիբեռանվտանգության, ամպային հաշվարկների, թվային տնտեսության, տեղեկատվական տեխնոլոգիաների և այլ ոլորտների կողքին արդեն նշված է արհեստական բանականության ներդրումն ու զարգացումը։ Արհեստական բանականության ուղղությամբ իրականացվում են տարբեր պետական նախաձեռնություններ։

Աշխատանքի և սոցիալական հարցերի նախարարությունն առաջարկվում է վերանվանել Աշխատանքի և բարեկեցության նախարարություն։  Նրա խոսքով՝ բարեկեցությունը ոչ թե առանձին ոլորտ է, այլ այն վերջնական արդյունքը, որին պետք է ծառայի նախարարության և ամբողջ Կառավարության քաղաքականությունը։ Նախարարության քաղաքականությունն առավել կենտրոնացած կլինի զբաղվածության խթանման, ընտանիքների աջակցման, երեխաների զարգացման, ակտիվ երկարակեցության, հաշմանդամություն ունեցող անձանց ներառման և յուրաքանչյուր քաղաքացու համար արժանապատիվ կյանքի հնարավորությունների ստեղծման վրա։

Առաջարկվում է Արտաքին գործերի նախարարությունը վերանվանել՝ դարձնելով Արտաքին գործերի և միջազգային առևտրի նախարարություն։ Ներկայացվեց, որ փոփոխությունների նպատակն է ավելի արդյունավետ համատեղել արտաքին քաղաքականությունն ու տնտեսական համագործակցությունը։

Ընդդիմադիր պատգամավորներն իրենց ելույթներում առարկություններ են հայտնել նախարարությունների անվանափոխության և գործառույթների վերանայման վերաբերյալ։ Հիմնականում պատգամավորները անհամաձայնություն ունեին Արտաքին գործերի նախարարության անվան փոփոխության հետ։

Երկրորդ ընթերցման ժամանակ Սրբուհի Գալյանը հայտնեց, որ առաջինից երկրորդ ընթերցման ժամանակահատվածում Կառավարությունը առաջարկել է հստակեցնել Էկոնոմիկայի նախարարությանը վերապահված քաղաքականության ուղղությունները։

Նախագիծը մշակող մարմնի ղեկավարն ասաց, որ առաջարկ է եղել վերականգնել գյուղատնտեսության և սփյուռքի նախարարությունները։ Սակայն, ըստ Սրբուհի Գալյանի, նախարարությունը դա նպատակահարմար չի համարել։

«Հայաստան» և «Ուժեղ Հայաստան» խմբակցությունները դեմ էին քվեարկել նախագծի առաջին ընթերցմանը, սակայն քվեարկության արդյունքում օրենսդրական փաթեթն ընդունվել էր։

Անի Թամրազյան