27.09.2026 | 16:24
Ադրբեջանում երկրաշարժ է գրանցվել
Դավիթաշենի գերեզմանատան մոտ թմրամիջոց իրացնելու կասկածանքով 35-ամյա տղամարդ է ձերբակալվել
Հասարակություն
13.08.2026 | 15:38
Համայնքային ոստիկանության Դավիթաշենի բաժնի ծառայողները օգոստոսի 6-ին Դավիթաշենի գերեզմանատանը հարակից տարածքում հայտնաբերել և թմրամիջոց ձեռք բերելու ու իրացնելու հիմնավոր կասկածանքով ձերբակալել են 35-ամյա տղամարդու։ ՆԳՆ ոստիկանության փոխանցմամբ՝ նա բաժին է ներկայացվել իր կողմից շահագործվող «Պորշ» մակնիշի մեքենայով։
Տղամարդու անձնական խուզարկությամբ հայտնաբերվել է «կրիստալ» տեսակի թմրամիջոցի նմանվող զանգվածով 31 փաթեթ՝ ընդհանուր 26,33 գրամ քաշով, ինչպես նաև դեղնականաչավուն զանգվածով կաթուցիչ։
Ըստ ոստիկանության՝ բացատրական աշխատանքի ընթացքում տղամարդը հայտնել է, որ «Տելեգրամ»-ի ալիքի օգտատիրոջից իրացնելու նպատակով ձեռք է բերել «կրիստալ» տեսակի թմրամիջոցի 50 փաթեթ՝ նախապես փոխանցելով 300 դոլար։ Նա նաև հայտնել է, որ փաթեթների մի մասը մեքենայում է, իսկ մեկ փաթեթ արդեն տեղադրել է։
Նախաձեռնված քրեական վարույթի շրջանակում հատուկ պահպանվող տարածք տեղափոխված մեքենայում կատարված խուզարկությամբ հայտնաբերվել է «կրիստալ» տեսակի թմրամիջոցի նմանվող զանգվածով ևս 16 փաթեթ՝ ընդհանուր 21,39 գրամ քաշով։
Երևանի բնակիչ 35-ամյա տղամարդը կազմված փաստաթղթերի հետ ներկայացվել է նախաքննական մարմին։ Նախաքննությունը շարունակվում է։
