«Արարատ-Արմենիան» դուրս մնաց Չեմպիոնների լիգայից. ՏԵՍԱՆՅՈՒԹ

«Արարատ-Արմենիան» ավարտեց ելույթները Չեմպիոնների լիգայում ու կպայքարի Եվրոպա լիգայի հիմնական փուլի ուղեգրի համար։

Գլխավոր եվրագավաթի որակավորման երրորդ փուլի պատասխան խաղում Հայաստանի չեմպիոնը մրցակցի խաղադաշտում 0:2 հաշվով ցավալի պարտություն կրեց սլովենական «Ցելյեից», որին տանը հաղթել էր 2։1 հաշվով։

Լյուբլյանայում կայացած պատասխան խաղում Սլովենիայի չեմպիոնը հաղթանակ կորզեց վերջնամասում՝ 2 գոլ խփելով 2 րոպեում: 83-րդ րոպեին հաշիվը բացեց ավստրալացի վինգեր Յայա Դուկուլին (տեսանյութ), իսկ 2 րոպե անց խաղի վերջակետը դրեց սլովենացի հարձակվող Բենժամին Վերբիչը (տեսանյութ):

«Արարատ-Արմենիան» եվրագավաթներում պայքարը կշարունակի Եվրոպա լիգայի որակավորման փլեյ-օֆֆում ու կմրցի «Կուպս» (Ֆինլանդիա) – «Ունիվերսիտատյա Կրայովա» (Ռումինիա) զույգի հաղթողի հետ։ Այդ դիմակայության առաջին խաղն ավարտվել է 1:1 հաշվով:

«Ցելյեն» Չեմպիոնների լիգայի որակավորման վերջին փուլում կմրցի Սլովակիայի չեմպիոն Բրատիսլավայի «Սլովանի» հետ, որը երկու անգամ հաղթեց շվեդական «Մյելբյուին» (2:1, 2:0):

Հիշեցնենք, որ Չեմպիոնների լիգայի որակավորման նախորդ երկու փուլերում «Արարատ-Արմենիան» պայքարից դուրս էր թողել Լատվիայի չեմպիոն «Ռիգային» (2:0, 2:3) ու իռլանդական «Շեմրոք Ռովերսին» (2:0, 1:2)` ապահովելով առնվազն Կոնֆերենցիաների լիգայի հիմնական փուլի ուղեգիր։

Չեմպիոնների լիգա, որակավորման երրորդ փուլ, պատասխան հանդիպում

«Ցելյե» (Սլովենիա) – «Արարատ-Արմենիա» (Հայաստան)՝ 2։0 (առաջին հանդիպում՝ 1։2)

Յայա Դուկուլի, 83, Բենժամին Վերբիչ, 85