04.09.2026 | 23:57
Էդուարդ Սպերցյանի գոլն օգնեց «Ալ Ահլիին» վստահ հաղթանակ տանել. ՏԵՍԱՆՅՈՒԹ
Բողոքարկումը չի հետաձգի վարորդական իրավունքի կասեցումն ու տուգանային միավորների կիրառումը․ նախագիծ
Հասարակություն
10.08.2026 | 13:50
Նախատեսվում են օրենսդրական փոփոխություններ, որոնք էականորեն կփոխեն երթևեկության կանոնների խախտման համար նշանակված տույժերի բողոքարկման կարգը։ Եթե վարորդներն այժմ կարող են պարզապես բողոքարկել որոշումը և դրանով իսկ կասեցնել տույժի կիրառումը, օրինակ՝ շարունակելով վարել մեքենան, ապա նոր կարգով բողոքարկումն այլևս չի հետաձգի պատասխանատվությունը։ Նախագիծը շրջանառության է դրել Արդարադատության նախարարությունը։
Երբ քաղաքացին բողոքարկում է իր դեմ կայացված վարչական որոշումը, դրա գործողությունը կամ կատարումը ժամանակավորապես կասեցվում է։ Սակայն նոր փոփոխությունների նախագծով առաջարկվում են հատուկ բացառություններ։ Նախարարությունն առաջարկում է, որ որոշումը բողոքարկելը այլևս չի կասեցնելու հետևյալ տույժերի կիրառումը՝ վարորդական իրավունքի կասեցում, վարորդական իրավունքից զրկում, տուգանային միավորների կիրառում։
Ստացվում է՝ եթե ստանաք որոշում, որով նախատեսվում է և՛ դրամական տուգանք, և՛ տուգանային միավորների նվազեցում, ապա բողոքարկման դեպքում կկասեցվի միայն գումարի վճարումը։ Տուգանային միավորների կիրառումը չի կասեցվի և կմնա ուժի մեջ։
Նախագիծը հանրային քննարկման կմնա մինչև օգոստոսի 25-ը։
Արփի Հակոբյան
