Խաղաղությունն ու բարգավաճումը փոխկապակցված են. Ռուբիոն՝ Հայաստանի և Ադրբեջանի տնտեսական հնարավորությունների մասին

ԱՄՆ պետքարտուղար Մարկո Ռուբիոն Հայաստանի և Ադրբեջանի միջև խաղաղության գործընթացի մեկնարկից մեկ տարի անց հայտարարել է, որ Վաշինգտոնը շարունակելու է աջակցել երկու երկրների միջև ձեռք բերված պայմանավորվածությունների իրականացմանը։

«Մեկ տարի առաջ այս օրը նախագահ Թրամփը ապահովեց խաղաղություն Հայաստանի և Ադրբեջանի միջև՝ Սպիտակ տանը հյուրընկալելով Ադրբեջանի նախագահ Իլհամ Ալիևին և Հայաստանի վարչապետ Նիկոլ Փաշինյանին և ականատես լինելով նրանց կողմից պատմական համատեղ հռչակագրի ստորագրմանը»,- նշել է Ռուբիոն։

Նրա խոսքով՝ այդ հռչակագիրը վերջ դրեց Հարավային Կովկասում տասնամյակներ տևած հակամարտությանը և հիմք դրեց «Թրամփի ուղի հանուն միջազգային խաղաղության և բարեկեցության» (TRIPP) նախաձեռնությանը։

Ռուբիոն նշել է, որ վերջին 12 ամիսների ընթացքում ԱՄՆ-ը Հայաստանի և Ադրբեջանի հետ համատեղ աշխատել է ձեռք բերված պայմանավորվածությունները գործնական առաջընթացի վերածելու ուղղությամբ։

Նրա խոսքով՝ TRIPP-ը աստիճանաբար վերածվում է իրականության։ Ռուբիոն հայտնել է, որ Հայաստանում արդեն սկսվել են երկաթուղու նախագծման և ուսումնասիրության աշխատանքները, իսկ Ադրբեջանը մոտենում է Հայաստանի հետ կապվելու համար նախատեսված ավտոմայրուղու և երկաթուղու շինարարության ավարտին։

Ռուբիոն նաև հայտարարել է, որ խաղաղությունը նպաստել է ԱՄՆ-ի, Հայաստանի և Ադրբեջանի միջև հարաբերությունների զարգացմանը, ինչը, նրա խոսքով, կնպաստի երեք երկրների տնտեսական բարգավաճմանը։

Նա հայտնել է, որ սկսել է գործել «Անդրկասպյան ձեռնարկությունների հիմնադրամը» (Trans-Caspian Enterprise Fund), որի տնօրենների խորհուրդն արդեն ընտրվել է։ Հիմնադրամը ԱՄՆ կառավարության կողմից ստացել է 201 մլն դոլարի ֆինանսավորում՝ Հարավային Կովկասում և Կենտրոնական Ասիայում Անդրկասպյան առևտրային երթուղու՝ «Միջին միջանցքի» շրջանակում մասնավոր հատվածի ներդրումները խթանելու նպատակով։

«Այս առաջընթացն արտացոլում է մի պարզ ճշմարտություն՝ խաղաղությունն ու բարգավաճումը փոխկապակցված են»,– նշել է Ռուբիոն։

Նրա խոսքով՝ TRIPP-ը պարզապես ենթակառուցվածքային նախագիծ չէ, այլ «Միջին միջանցքի» կարևոր օղակ, որը նոր առևտրային հնարավորություններ կստեղծի ԱՄՆ-ի և այլ երկրների համար և կարող է օրինակ ծառայել այն բանի, թե ինչպես տնտեսական համագործակցությունը կարող է ամրապնդել խաղաղությունը երկարատև վեճերի կարգավորումից հետո։

Ռուբիոն ընդգծել է, որ ԱՄՆ-ը շարունակում է լիովին հանձնառու լինել Հայաստանի և Ադրբեջանի հետ աշխատանքին՝ ձեռք բերված հիմքի վրա խաղաղությունը զարգացնելու նպատակով։

«Մենք շնորհավորում ենք երկու երկրներին վերջին մեկ տարվա ընթացքում ցուցաբերած խիզախության և տեսլականի համար և ակնկալում ենք Հարավային Կովկասում կայուն և երկարատև խաղաղության ուղղությամբ հետագա առաջընթացը»,- եզրափակել է նա։