Գարեգին Բ-ի և եպիսկոպոսների գործով դատավորն ինքնաբացարկ հայտնեց. ՏԵՍԱՆՅՈՒԹ

Արմավիրի մարզի ընդհանուր իրավասության դատարանի Էջմիածնի նստավայրում՝ դատավոր Հակոբ Մանուկյանի նախագահությամբ մեկնարկեց Ամենայն հայոց կաթողիկոս Գարեգին Բ-ի և 6 եպիսկոպոսների գործով առաջին դատական նիստը, որը տևեց մոտ 15 րոպե․ դատավոր Մանուկյանն ինքնաբացարկ հայտնեց։

Դատավոր Մանուկյանը նիստի սկզբում հայտարարեց, որ այս պահին մասնավոր կյանքի, այդ թվում իր մասով հանգամանքներ պետք է հրապարակվեն, ուստի գործի քննությունն կշարունակվի դռնփակ։ Դատավարական կողմերից բացի՝ դահլիճում ներկա մյուս հոգևորականները, քաղաքական գործիչները և լրատվամիջոցները դուրս հրավիրվեցին։

Հինգ րոպե անց փաստաբանները դուրս եկան դահլիճից․ Արա Զոհրաբյանը հայտարարեց, որ դատավորն ինքնաբացարկ է հայտնել․ «Դատավորը ժամանակին փաստաբան է եղել, իր արտոնագիրը ես եմ տվել և դա որպես հիմք ընդունելով, դատավորը նշեց, որ դա կարող է հիմնավոր կասկած առաջացնել, ուստի ինքնաբացարկ է հայտնում»։

Հակոբ Մանուկյանի նախագահությամբ գործի քննությունն ավարտվեց։

Հիշեցնենք՝ փետրվարի 14-ին հայտնի դարձավ, որ կաթողիկոսին և 6 եպիսկոպոսներին՝ Տեր Նաթան արքեպիսկոպոս Հովհաննիսյանին, Տեր Հովնան եպիսկոպոս Հակոբյանին, Տեր Մակար եպիսկոպոս Հակոբյանին, Տեր Մուշեղ եպիսկոպոս Բաբայանին, Տեր Հայկազուն արքեպիսկոպոս Նաջարյանին և Տեր Վահան եպիսկոպոս Հովհաննիսյանին մեղադրանք է առաջադրվել ՀԱԵ Մասյացոտնի թեմի կարգալույծ հռչակված առաջնորդի՝ Տեր Գևորգ եպիսկոպոս Սարոյանի հետ կապված դատական ակտի կատարմանը խոչընդոտելու հոդվածով: Արգելվեց հոգևորականներին լքել ՀՀ տարածքը։

Մասնավորապես, Սարոյանն իրեն թեմի առաջնորդի պաշտոնից ազատելու որոշումը վիճարկել էր դատարանում՝ միաժամանակ ներկայացնելով նաև հայցի ապահովման միջոց կիրառելու միջնորդություն, որով խնդրել է մինչև վերջնական դատական ակտ կայացնելը իրեն վերականգնել թեմի առաջնորդի պաշտոնում։ Դատարանը բավարարել էր միջնորդությունը։ Հոգևորականը, սակայն, ոչ միայն չէր վերականգնվել պաշտոնում, այլև կարգալույծ էր հռչակվել, իսկ Գարեգին Բ-ի որոշմամբ թեմի առաջնորդ էր նշանակվել մեկ այլ հոգևորական։ Ամբողջ մեղադրանքը կառուցված է հենց այս միջադեպի շուրջ։

Մանրամասները՝ տեսանյութում։

Ռոզա Վարդանյան