«Մասնավոր կյանքի հանգամանքներ պետք է հրապարակվեն»․ Գարեգին Բ-ի և մյուսների գործը կքննվի դռնփակ. ՏԵՍԱՆՅՈՒԹ

Արմավիրի մարզի ընդհանուր իրավասության դատարանի Էջմիածնի նստավայրում՝ դատավոր Հակոբ Մանուկյանի նախագահությամբ, մեկնարկեց Ամենայն Հայոց Կաթողիկոս Գարեգին Բ-ի և 6 եպիսկոպոսների գործով առաջին դատական նիստը։

Դատավոր Մանուկյանը նիստի սկզբում հայտարարեց, որ այս պահին մասնավոր կյանքի, այդ թվում՝ իր մասով հանգամանքներ պետք է հրապարակվեն, ուստի գործի քննությունն այս պահին կշարունակվի դռնփակ։ Դատավարական կողմերից բացի՝ դահլիճում ներկա մյուս հոգևորականները, քաղաքական գործիչները և լրատվամիջոցները դուրս հրավիրվեցին․ քննությունը շարունակվում է դռնփակ։

Հիշեցնենք՝ փետրվարի 14-ին հայտնի դարձավ, որ Կաթողիկոսին և 6 եպիսկոպոսներին՝ Տեր Նաթան արքեպիսկոպոս Հովհաննիսյանին, Տեր Հովնան եպիսկոպոս Հակոբյանին, Տեր Մակար եպիսկոպոս Հակոբյանին, Տեր Մուշեղ եպիսկոպոս Բաբայանին, Տեր Հայկազուն արքեպիսկոպոս Նաջարյանին և Տեր Վահան եպիսկոպոս Հովհաննիսյանին մեղադրանք է առաջադրվել ՀԱԵ Մասյացոտնի թեմի կարգալույծ հռչակված առաջնորդի՝ Տեր Գևորգ եպիսկոպոս Սարոյանի հետ կապված դատական ակտի կատարմանը խոչընդոտելու հոդվածով: Արգելվեց հոգևորականներին լքել ՀՀ տարածքը։

Մասնավորապես, Սարոյանն իրեն թեմի առաջնորդի պաշտոնից ազատելու որոշումը վիճարկել էր դատարանում՝ միաժամանակ ներկայացնելով նաև հայցի ապահովման միջոց կիրառելու միջնորդություն, որով խնդրել է մինչև վերջնական դատական ակտ կայացնելը իրեն վերականգնել թեմի առաջնորդի պաշտոնում։ Դատարանը բավարարել էր միջնորդությունը։ Հոգևորականը, սակայն, ոչ միայն չէր վերականգնվել պաշտոնում, այլև կարգալույծ էր հռչակվել, իսկ Գարեգին Բ-ի որոշմամբ թեմի առաջնորդ էր նշանակվել մեկ այլ հոգևորական։ Ամբողջ մեղադրանքը կառուցված է հենց այս միջադեպի շուրջ։

Մանրամասները՝ տեսանյութում։

Ռոզա Վարդանյան