Ավետիք Չալաբյանի վերաբերյալ քրեական վարույթի նախաքննությունն ավարտվել է․ ՔԿ

Քննչական կոմիտեն հայտնում է, որ ավարտվել է մի խումբ անձանց կողմից ընտրական իրավունքի իրականացմանը խոչընդոտելու նախապատրաստության վերաբերյալ քրեական վարույթի նախաքննությունը՝ «Հայաքվե» ազգային քաղաքացիական միավորման համակարգող Ավետիք Չալաբյանի մասով։

Ըստ ՔԿ-ի՝ Չալաբյանը մեղադրվում է 2026 թվականի հունիսի 7-ի խորհրդարանական ընտրությունների ընթացքում քաղաքացիների ընտրական իրավունքի ազատ իրականացմանը խոչընդոտելու նախապատրաստություն կատարելու մեջ։

Քննչական կոմիտեի պնդմամբ՝ նա օտարերկրյա պետության ներկայացուցիչների հետ հանդիպման ժամանակ նրանց դրդել է ծառայողական դիրքն ու ազդեցությունն օգտագործել՝ այդ երկրում աշխատող Հայաստանի քաղաքացիներին Հայաստան ուղարկելու և «Ուժեղ Հայաստան» դաշինքի օգտին քվեարկելու նպատակով։

«Քննչական և վարութային գործողությունների արդյունքում բացահայտվել է հանցանք կատարած անձը և հսկող դատախազի որոշմամբ Չալաբյանի նկատմամբ հարուցվել է հանրային քրեական հետապնդում՝ Քրեական օրենսգրքի 43-210-րդ հոդվածի 2-րդ մասի 5-րդ և 6-րդ կետերով (իշխանական կամ ծառայողական լիազորությունները կամ դրանցով պայմանավորված ազդեցությունն օգտագործելով մի խումբ անձանց կողմից նախնական համաձայնությամբ ընտրական իրավունքի իրականացմանը խոչընդոտելու նախապատրաստություն)»,- ասված է ՔԿ հաղորդագրության մեջ։

ՔԿ-ի տեղեկացմամբ՝ Ավետիք Չալաբյանի նկատմամբ հարուցվել է հանրային քրեական հետապնդում, որպես խափանման միջոց կիրառվել է կալանքը, իսկ նրա վերաբերյալ քրեական վարույթը մեղադրական եզրակացությամբ հանձնվել է հսկող դատախազին։