Այն ուժերը, որոնք անցել են խորհրդարան, շատ խոցելի են, իշխող ուժը օգտագործելու է դա․ Գրիգորյան․ ՏԵՍԱՆՅՈւԹ

Այս բևեռացած քաղաքականության պատճառով մենք չունենք իրավամբ ժողովրդավարական քաղաքական ուժեր, որոնք ներկայացված են խորհրդարանում և կարող են իրականացնել ժողովրդավարական վերահսկողություն իշխող ուժի նկատմամբ: Այս մասին Ժողովրդավարության և անվտանգության տարածաշրջանային կենտրոնի հրավիրած քննարկման ժամանակ ասաց կենտրոնի նախագահ Տիգրան Գրիգորյանը։

«Այն ուժերը, որոնք անցել են խորհրդարան, շատ խոցելի են: Իշխող ուժը բնականաբար օգտագործելու է այդ խոցելիությունները:

Նախորդ խորհրդարանի պարագայում, իհարկե, այն հանգամանքը, որ հիմնական, գլխավոր ընդդիմադիր ուժը կապված էր երկրորդ նախագահի հետ, այսինքն՝ այդ միֆական նախկինների հետ ու նաև այդ վատ էլիտաների հետ, որոնց մասին դու խոսեցիր, շահագործվում էր իշխող ուժի կողմից շատ հակաժողովրդավարական քայլեր արդարացնելու համար և այդ «սև ու սպիտակ» երկընտրանքի առաջ դնելու համար. «Տեսեք՝ մենք կարող ա ինչ-որ լավ բաներ չենք անում, բայց այլընտրանքը նրանք են»:

Հիմա կարծում եմ՝ իրավիճակը ավելի է սրվել, որովհետև առնվազն հանրային ընկալումներում գլխավոր ընդդիմադիր ուժը, որ անցել է խորհրդարան, ընկալվում է որպես Ռուսաստանի հետ աֆիլացված ուժ կամ առնվազն շատ պրոռուսական ուժ: Եվ սա, բնականաբար, ևս շահագործվելու է իշխող ուժի կողմից, ու նպաստելու է այս հակաժողովրդավարական միտումների խորացմանը, որովհետև ամեն ինչ դիտարկվելու է այդ ինքնիշխանության պաշտպանության, ինքնիշխանության ուժեղացման օրակարգի ներքո: Եվ նույնիսկ շատ մանր հարցեր, որոնք կապ չունեն այս թեմաների հետ, ներկայացվելու են որպես իշխանության պահպանման փորձ»,-նշել է Տիգրան Գրիգորյանը։

Մանրամասները՝ տեսանյութում։

Եվգենյա Համբարձումյան