Ամեն օր պարզվում է, որ այս գործը «մախինացիա» է, սուտ և շինծու. Արման Աբովյան․ ՏԵՍԱՆՅՈՒԹ

Արդեն երրորդ օրն է՝ Քննչական կոմիտեում շարունակվում է ԲՀԿ առաջնորդ Գագիկ Ծառուկյանի հարցաքննությունը։ Կոմիտեի շենքի դիմաց այսօր ոչ միայն նրա քաղաքական ուժի ներկայացուցիչներն են, աջակիցներն ու համակիրները, այլևս ընդդիմադիր մյուս ուժերի ներկայացուցիչները։

ԲՀԿ ներկայացուցիչ Արման Աբովյանի խոսքով՝ Ծառուկյանի դեմ հարուցված քրեական գործը զուրկ է իրավական հիմքերից և կրում է բացառապես քաղաքական բնույթ. «Արդեն երրորդ օրն է՝ նորմալ, հասկանալի, հոդաբաշխ պատասխաններ մենք չստացանք։ Այն, որ ամեն օր պարզվում է, որ այս գործը, ըստ էության, մեքենայություն է, մախինացիա, սուտ, շինծու գործ է և ունի միայն ու միայն քաղաքական դրդապատճառ, կարծում եմ՝ արդեն իշխանություններն էլ տենց չեն էլ թաքցնում դա։ Ըստ էության, ունենք մի իրավիճակ, երբ որ զուգահեռ այսօրվա գործընթացներին, շարունակվում են ճնշումները այն մարդկանց վրա և այն կազմակերպությունների վրա, ովքեր այս կամ այն առումով կապ ունեն Գագիկ Ծառուկյանի հետ։ Ի՞նչ է սա նշանակում։ Սա նշանակում է միայն մի բան՝ մենք ապրում ենք դասական քաղաքական հետապնդման պայմաններում, ընդ որում՝ հետապնդման այն մարդկանց վրա, ովքեր այս կամ այն առումով իշխանությունների հետ համաձայն չեն։ Եվ Գագիկ Ծառուկյանի հետ կապված գործընթացները ունեն միայն այդ բնույթը»։

Աբովյանը հիշեցրեց Ծառուկյանի նախընտրական կոչերը՝ «ուղղված հանրային համերաշխությանը և երկրի առջև ծառացած վտանգների մասին նախազգուշացումները»։ Ըստ նրա՝ հենց այս քաղաքական դիրքորոշումն է դարձել հետապնդումների պատճառ։

«Սա միայն մեկ անձի խնդիր չէ։ Այն, ինչ այսօր կատարվում է Գագիկ Ծառուկյանի հետ, վաղը կարող է կատարվել յուրաքանչյուր քաղաքացու հետ, ով հանկարծ իշխանությունների դուրը չի գա։ Ուստի, Գագիկ Ծառուկյանի ազատությունը բոլորիս խնդիրն է»,- ասաց նա։

Մանրամասները՝ տեսանյութում։