Արդեն որոշել եք՝ ԱԺ նիստին գնամ ոստիկանների ուղեկցությամբ. Արթուր Սարգսյանը վրդովվեց և լքեց նիստերի դալիճը․ ՏԵՍԱՆՅՈՒԹ

«Ինչպես այս մի տարվա բոլոր որոշումները, այս որոշումն էլ ինձ համար անակնկալ չէր, հարգարժան դատարան»,- անդրադառնալով իր նկատմամբ կիրառված տնային կալանք խափանման միջոցը վերացնելու մասին միջնորդության մերժմանը, դատավոր Կարեն Ֆարխոյանին դիմեց Արթուր Սարգսյանը։

Հիշեցնենք՝ դատարանը խափանման միջոցի փոփոխումը մերժեց՝ թույլատրելով օգոստոսի 2-ին կայանալիք ԱԺ անդրանիկ նիստին «Հայաստան» դաշինքի պատգամավոր Արթուր Սարգսյանին ներկայանալ ոստիկանների ուղեկցությամբ։ Այս հանգամանքը վրդովեցրեց Սարգսյանին։

«Մի հատ հետաքրքիր բան կա։ Հուլիսի 30-ին խափանման միջոցի հետ կապված նիստ կա, հլը 30-ին պիտի որոշենք, բայց Դուք արդեն ԱԺ նիստին մասնակցելու որոշում եք կայացրել, ասում եք՝ օգոստոսի 2-ին…ստացվում է՝ արդեն որոշումը կայացրել եք 30-ի համար: Ձեր բառերն եմ ասում. «Օգոստոսի 2-ին Սարգսյան Արթուրը կարող է պրոբացիայի ոստիկաններով գնալ Ազգային ժողով»: Դուք արդեն, որ դուրս եկաք միջանցք, արդեն 30-ի որոշումն էլ, հրամանն էլ եք ստացել։ Միանգամից հրապարակեք. օգոստոսի 2-ին ոստիկաններով կգնամ: Ինձ համար հետաքրքիր հարց է առաջացել. այս վեց ամիս է՝ ինչո՞ւ եք ոստիկաններին ինձ հետ բերում-տանում նիստի։ Եկեք էսպես անենք… Դե հիմա Ձեր ասածները… Գժի տեղ եք դրել… Հլը ամսի 30-ի նիստին Դուք արդեն որոշում եք կայացրել…»,- բարկացավ Սարգսյանը և ձեռքերն օդում թափ տալով լքեց նիստերի դահլիճը։

Մի քանի րոպե ապակեպատ դահլիճում բարձրախոսի ձայներն անջատվեցին, լրագրողների համար լսելի չեղավ, թե ինչ հայտարարություններ հաջորդեցին Սարգսյանի ելույթին։ Նիստն ավարտվեց։

Մանրամասները՝ տեսանյութում։