Առինջում բարձր լարման գծերի տակ գտնվող ինքնակամ կառույցները կապարակնքվել են․ ՔԿ

Առինջի 3.5 հա մակերեսով հողամասի ինքնակամ կառույցները գտնվում են բարձր լարման էլեկտրահաղորդման գծերի տակ՝ վտանգելով քաղաքացիների կյանքն ու առողջությունը

Քննչական կոմիտեի տվյալներով՝ Առինջում գտնվող 3.5 հա տարածքի որոշ ինքնակամ կառույցներ, ավտոկայանատեղին և առևտրի տաղավարների մի մասը կառուցված են բարձր լարման էլեկտրահաղորդման գծերի անմիջական հարևանությամբ և երկաթուղու պաշտպանական գոտում։ Դրանց հետագա շահագործումը քաղաքացիների կյանքի և առողջության համար վտանգավոր համարելով՝ վարույթն իրականացնող մարմինը կնիքել է կառույցները։

«ՀՀ քննչական կոմիտեի Կոտայքի մարզային քննչական վարչությունում քննվող քրեական վարույթի շրջանակում 2025 թվականի հունիսի 5-ին նշանակվել է համալիր փորձաքննություն, որի եզրակացությունը ստացվել է 2026 թվականի հունիսի 10-ին:

Համաձայն փորձագետի եզրակացության՝ Աբովյան համայնքի գյուղ Առինջ հասցեում գտնվող 3.5 հա մակերեսով հողամասը փաստացի համադրվում է 110 կՎ լարման էլեկտրահաղորդման գծի զբաղեցրած և այդ գծի անվտանգության համար նախատեսված հողամասի հետ, բացի այդ, գտնվում է «Երկաթուղային տրանսպորտի մասին» ՀՀ օրենքի 15.1-ին հոդվածի 9-րդ մասով սահմանված՝ Երևան-Աբովյան 1520 մմ ռելսամիջի երկաթուղային գծի պաշտպանական գոտու տարածքում:
Փորձագետը հանգել է այն հետևության, որ գյուղ Առինջ հասցեում գտնվող 3.5 հա մակերեսով հողամասի օտարման գործընթացը կազմակերպվել է առանց հաշվի առնելու տվյալ ժամանակահատվածում գործած ՀՀ հողային օրենսգրքի 60-րդ հոդվածով սահմանված պահանջները։

Փորձագետը փաստել է նաև, որ Առինջ հասցեում գտնվող 3.5 հա մակերեսով հողամասում առկա ինքնակամ կառույցները գտնվում են (կառուցված են) բարձր լարման էլեկտրահաղորդման գծերի անվտանգության գոտիներում, ինչպես նաև Երևան-Աբովյան 1520 մմ ռելսամիջի երկաթուղային գծի պաշտպանական գոտիներում։

Այսպիսով, հաշվի առնելով, որ Առինջ հասցեում գտնվող 3.5 հա մակերեսով հողամասում առկա որոշ ինքնակամ կառույցներ, ավտոկայանատեղին և դրան կից առևտրի տաղավարների մի մասը փաստացի անմիջականորեն գտնվում են բարձր լարման էլեկտրահաղորդման գծերի տակ և դրանց հետագա շահագործումը վտանգ է ներկայացնում քաղաքացիների կյանքի և առողջության համար, անվտանգության նկատառումներից ելնելով՝ վարույթն իրականացնող մարմնի կողմից կնիքվել են»,- ասված է ՔԿ-ի տարածած հաղորդագրությունում։

Հիշեցնենք, որ այսօր՝ հուլիսի 23-ին, «Առինջ մոլի» տաղավարների աշխատակիցները բողոքի ակցիա էին իրականացրել՝ պահանջելով իրավապահներից պարզաբանել կապարակնքման հիմքերը։ Ակցիայի մասնակիցների խոսքով՝ տաղավարների մի մասը կապարակնքվել է առանց նախնական ծանուցման, ինչի հետևանքով խաթարվել է առևտրի կենտրոնի աշխատանքը։ Նրանք հայտնել են, որ շարունակելու են պահանջել խնդրի վերաբերյալ հստակ պարզաբանումներ։ Ավելի վաղ՝ հուլիսի 20-ին, հաղորդվել էր «Առինջ մոլում» քննչական գործողությունների և շուրջ 10-15 տաղավարի գործունեության կասեցման մասին։