14.08.2026 | 23:22
Հուլիսին Ուկրաինայում զոհվել է առնվազն 437 խաղաղ բնակիչ՝ ամենաբարձր ցուցանիշը 2022-ից ի վեր. ՄԱԿ
Չեմ նեղվել, որ 1 տարի է՝ կալանքի տակ եմ, բողոք չունեմ. Արթուր Սարգսյան․ ՏԵՍԱՆՅՈՒԹ
Հասարակություն
23.07.2026 | 17:37
Բագրատ արքեպիսկոպոս Գալստանյանի և մյուսների գործով դատական նիստին քննարկվում է ամբաստանյալ, ՀՀ 9-րդ գումարման Ազգային ժողովի նորընտիր պատգամավոր Արթուր Սարգսյանի նկատմամբ կիրառված տնային կալանքը վերացնելու միջնորդությունը։ Պաշտպան Արամ Վարդևանյանը հայտարարեց, որ Սարգսյանն արդեն երկու օր է՝ գտնվում է անօրինական սահմանափակման մեջ, քանի որ ԿԸՀ հուլիսի 31-ի որոշմամբ ունի պատգամավորական անձեռնմխելիություն։
Սարգսյանը, անդրադառնալով միջնորդությանը, նշեց, որ ներկա իրավիճակը հիշեցնում է 2021 թվականի իրադարձությունները, երբ ինքը, լինելով պատգամավոր, գտնվում էր կալանավայրում և ազատ արձակվեց միայն Սահմանադրական դատարանի որոշումից հետո։
«Շատ հետաքրքիր է, ոնց որ պատմությունը հինգ տարին մեկ կրկնվում է։ 2021-ին Արամ Վարդևանյանն ապացուցեց, որ ինքը ճիշտ էր, իսկ դատախազական համակարգը՝ սխալ։ Հիմա էլ նույնն է. ես ամսի 21-ից պետք է անհապաղ ազատ արձակվեի, բայց արդեն երկու օր է՝ անօրինական սահմանափակման մեջ եմ»,— հայտարարեց Սարգսյանը։ Նա հավելեց, որ թեև «չի նեղվել» այդ երկու օրվա համար, սակայն իրավական առումով իրավիճակն անթույլատրելի է։
Հանրային մեղադրողը, առարկելով պաշտպանական կողմի միջնորդությանը, ներկայացրեց այլ իրավական մեկնաբանություն։ Ըստ դատախազի՝ Արթուր Սարգսյանը պատգամավորի կարգավիճակ ունի դեռևս 2021 թվականից, սակայն այդ կարգավիճակը նրան չի ազատում պատասխանատվությունից, քանի որ նրա անձեռնմխելիությունն արդեն իսկ հաղթահարվել է Ազգային ժողովի կողմից։
«Պարոն Սարգսյանը պատգամավորի կարգավիճակը շարունակում է կրել դեռևս 2021 թվականից։ Նախորդ տարի Գլխավոր դատախազի միջնորդությամբ Ազգային ժողովը նրան զրկել է անձեռնմխելիությունից»,- նշեց մեղադրողը։
Դատախազը նաև մեջբերեց Սահմանադրության 90-րդ հոդվածը՝ պնդելով, որ նորընտիր Ազգային ժողովի լիազորությունները և դրանից բխող իրավական հետևանքները սկսվելու են միայն առաջին նստաշրջանի բացման պահից, որը նախատեսված է օգոստոսի 2-ին։ Մինչ այդ, ըստ մեղադրանքի կողմի, նախկինում հաղթահարված անձեռնմխելիությունը շարունակում է մնալ ուժի մեջ։
Մանրամասները՝ տեսանյութում։
