Արթուր Սարգսյանը պետք է անհապաղ ազատ արձակվի. նա պատգամավորի անձեռնմխելիություն է ստացել. Վարդևանյան․ ՏԵՍԱՆՅՈՒԹ

Բագրատ արքեպիսկոպոս Գալստանյանի և մյուսների գործով դատական նիստին քննարկվում է ամբաստանյալ, ՀՀ 9-րդ գումարման Ազգային ժողովի նորընտիր պատգամավոր Արթուր Սարգսյանի նկատմամբ կիրառված տնային կալանքը վերացնելու միջնորդությունը։ Պաշտպան Արամ Վարդևանյանը հայտարարեց, որ Սարգսյանն արդեն երկու օր է՝ գտնվում է անօրինական սահմանափակման մեջ։

Վարդևանյանի խոսքով՝ 2024 թվականի հուլիսի 21-ին Կենտրոնական ընտրական հանձնաժողովի կողմից պատգամավորական մանդատների տրամադրման մասին արձանագրության հրապարակման պահից Արթուր Սարգսյանը ձեռք է բերել պատգամավորի կարգավիճակ։ Ըստ Սահմանադրական դատարանի նախադեպային որոշումների՝ պատգամավորի կարգավիճակ ձեռք բերելու պահից անձը չի կարող պահվել անազատության մեջ առանց Ազգային ժողովի համաձայնության։

«Սահմանադրական դատարանը խոսում է պատգամավորի կարգավիճակ ձեռք բերելու, այլ ոչ թե լիազորություններ ստանձնելու պահի մասին։ Արթուր Սարգսյանն այս դահլիճում այլևս գտնվում է անձեռնմխելիությունը չհաղթահարված անձի կարգավիճակով»,- հայտարարեց Վարդևանյանը՝ հավելելով, որ դատարանն ու Դատախազությունը պետք է հենց իրենք նախաձեռնեին նրա ազատ արձակումը։

Պաշտպանը նշեց, որ Արթուր Սարգսյանը, որպես Ազգային ժողովի 9-րդ գումարման պատգամավոր, իր լիազորությունները ստանձնելու է օգոստոսի 2-ին, ժամը 10:00-ին, սակայն «Սահմանադրական դատարանը խոսում է պատգամավորի կարգավիճակ ձեռք բերելու, այլ ոչ թե լիազորություններ ստանձնելու մասին»:

«Ի դեպ, դա էլ պատահական չէ, որովհետև նախքան լիազորություններ ստանձնելը, Ազգային ժողովի պատգամավորի կարգավիճակ ձեռք բերած անձը պետք է ողջամիտ հնարավորություն ունենա նախապատրաստվելու այդ լիազորությունների ստանձնմանը: Խոսքը գնում է խմբակցության կազմավորման մասին, խմբակցության կանոնադրության հաստատման մասին, ընթացիկ հարցերի նախապատրաստման մասին, ԱԺ առաջին նստաշրջանի առաջին նիստի հարցերի քննարկման մասին, մարտավարության մշակման մասին և ամենակարևորը՝ ներկայացուցչական մանդատի իրացման մասին»։

Մանրամասները՝ տեսանյութում։