43 մլն դրամ՝ «Մերիդիան»-ի հարակից 4000 քմ տարածքի ասֆալտապատման համար․ աշխատանքները պետք է ավարտին հասցվեն մինչև հոկտեմբեր

Երևանում գտնվող «Մերիդիան» էքսպո կենտրոնի հարակից շուրջ 4000 քմ համայնքային տարածքի ասֆալտապատման համար պետական բյուջեից 43 մլն դրամ կհատկացվի։ Աշխատանքները նախատեսվում է իրականացնել մինչև 2026 թվականի հոկտեմբերին Երևանում անցկացվելիք ՄԱԿ-ի Կենսաբանական բազմազանության մասին կոնվենցիայի կողմերի 17-րդ համաժողովը՝ COP17-ը։ Հարցն ընդգրկված է Կառավարության հուլիսի 23-ի նիստի օրակարգում։

Նախագծի հիմնավորման համաձայն՝ սա միջազգային բարձր մակարդակի և մեծածավալ միջոցառում է, ուստի համաժողովի վայրին հարող ճանապարհներն ու տրանսպորտային ենթակառուցվածքները պետք է լինեն՝ անվտանգ, հուսալի, բարեկարգ, ներկայացուցչական տեսքով։ Այս նպատակով որոշվել է բարեկարգել և ասֆալտապատել էքսպո կենտրոնին հարակից, Երևանի համայնքային ենթակայության տակ գտնվող մոտ 4000 քմ տարածքը։

Նախատեսվում է իրականացնել երկու հիմնական աշխատանք՝ կառուցել 25 սմ հաստությամբ խճակոպճաավազային հիմք, դրա վրա տեղադրել 5 սմ հաստությամբ ասֆալտբետոնե մեկ շերտ։

Այսինքն՝ խոսքը պարզապես արդեն գոյություն ունեցող ասֆալտը նորոգելու մասին չէ։ Հիմնավորումից հետևում է, որ նախ պետք է պատրաստվի համապատասխան խճային հիմք, այնուհետև կատարվի տարածքի ասֆալտապատումը։

Նախնական հաշվարկով նշվում է՝ 1 քմ-ի 5 սմ հաստությամբ ասֆալտապատումը՝ 6500 դրամ, 1 քմ-ի 25 սմ հաստությամբ խճային հիմքը՝ 4000 դրամ։

Այս երկու աշխատանքների ընդհանուր արժեքը մեկ քառակուսի մետրի համար ստացվում է 10 500 դրամ։ 4000 քմ-ի դեպքում հաշվարկային գումարը կազմում է մոտ 42 մլն դրամ։

Սակայն նախագծով նախատեսվում է հատկացնել 43 մլն դրամ։ Ամենայն հավանականությամբ, 1 մլն դրամի տարբերությունը պայմանավորված է նրանով, որ ներկայացված թվերը նախնական և մոտավոր հաշվարկներ են, հնարավոր է նաև հաշվի են առնվել լրացուցիչ, ուղեկցող կամ չնախատեսված ծախսեր։ Նշված է, որ որոշումը մշակելու պահին դեռևս՝

• պատրաստ չեն ասֆալտապատման նախագծանախահաշվային փաստաթղթերը,
• վերջնականապես հայտնի չէ աշխատանքների իրական արժեքը,
• աշխատանքների կատարման մրցույթ չի հայտարարվել,
• կապալառու կազմակերպություն ընտրված չէ,
• աշխատանքների կատարման պայմանագիր չի կնքվել։

Այս պատճառով 43 մլն դրամը վերջնական պայմանագրային արժեք չէ, այլ նախնական ֆինանսական գնահատական։ Տարածքային կառավարման և ենթակառուցվածքների նախարարությունը նախնական հաշվարկը ստացել է «Ճանապարհային դեպարտամենտ» հիմնադրամից՝ կառավարության որոշման նախագիծը շրջանառության մեջ դնելու համար։ Հետագայում պետք է պատրաստվեն նախագծանախահաշվային փաստաթղթերը, իրականացվեն գնումների գործընթացները, ընտրվի աշխատանքներն իրականացնող կազմակերպությունը և կնքվի պայմանագիր։

43 մլն դրամն առաջարկվում է հատկացնել ՀՀ կառավարության պահուստային ֆոնդից։

COP17 hամաժողովը սկսվելու է 2026 թվականի հոկտեմբերի 18-ին։ Հետևաբար աշխատանքները պետք է իրականացվեն ավելի վաղ՝ հիմնականում հուլիս-սեպտեմբեր ամիսներին, այսինքն՝ տարվա երրորդ եռամսյակում։

Եվգենյա Համբարձումյան