Նարեկ Կարապետյանը չի կալանավորվի, ԿԸՀ-ն վերադարձրել է Դատախազության այդ միջնորդությունը. Արամ Վարդևանյան. ՏԵՍԱՆՅՈւԹ

Կենտրոնական ընտրական հանձնաժողովը վերադարձրել է Նարեկ Կարապետյանի նկատմամբ խափանման միջոց ընտրելու վերաբերյալ դատախազության միջնորդությունը։ Այս մասին լրագրողների հետ զրույցում հայտնեց Արամ Վարդևանյանը:

«Կենտրոնական ընտրական հանձնաժողովը վերադարձրել է նշված միջնորդությունը, այսինքն՝ խափանման միջոցի հարց` կալանքի կամ տնային կալանքի, Նարեկ Կարապետյանի դեպքում տեղի չի ունենալու»,- ասաց Վարդևանյանը։

Նրա խոսքով՝ ԿԸՀ նիստում իրենք ներկայացրել են Սահմանադրական դատարանի համապատասխան որոշման հիմքերը, մասնավորապես` պատգամավորի կարգավիճակ ունեցող անձի նկատմամբ սահմանափակումների վերաբերյալ դրույթները։ Վարդևանյանը նշեց, որ դատախազության կողմից այդ փաստարկներին բովանդակային հակափաստարկ չի ներկայացվել։

Վարդևանյանը կարծիքով՝ առաջիկայում կարող է լինել Նարեկ Կարապետյանին նոր մեղադրանք առաջադրելու և ավելի մեղմ խափանման միջոց ընտրելու գործընթաց։

«Ամենահավանական կանխատեսումն այն է, որ առաջիկայում կլինի Նարեկ Կարապետյանին մի խայտառակ, ապօրինի, աբսուրդային մեղադրանքի առաջադրման գործընթաց և ավելի նվազ խափանման միջոցի ընտրության գործընթաց»,– ասաց նա։

Վարդևանյանը, միաժամանակ, նշեց, որ ԿԸՀ-ի կողմից մեղադրանք առաջադրելու համաձայնությունը ևս իրենց համար ընդունելի չէ։

«Այն փաստը, որ մեղադրանք առաջադրելու գործընթացի վերաբերյալ ԿԸՀ համաձայնությունը եղավ, դա մեզ համար նույնչափ անընդունելի է, ինչպես ի սկզբանե նշում էինք»,- ասաց նա։

Մեր հարցին՝ արդյո՞ք սա նշանակում է, որ Նարեկ Կարապետյանը զրկվել է անձեռնմխելիությունից, Վարդևանյանը պատասխանեց, որ գործընթացն ունի երկու բաղադրիչ։

«Անձեռնմխելիության զրկման երկու կոմպոնենտ կա՝ մի մասով այո, մի մասով՝ չէ։ Մեղադրանքի մասով՝ այո»,- նշեց նա։

Նրա խոսքով՝ իրավական տեսանկյունից դատախազության կողմից նույն միջնորդությունը կրկին Ազգային ժողով ներկայացնելու հնարավորությունը ողջամիտ իրավունքի սահմաններում խնդրահարույց է։

Մանրամասները՝ տեսանյութում:

Արփի Հակոբյան