ԿԸՀ-ն համաձայնություն է տվել Նարեկ Կարապետյանին մեղադրանք առաջադրելու Դատախազության միջնորդությանը․ ՏԵՍԱՆՅՈՒԹ

Կենտրոնական ընտրական հանձնաժողովը բավարարել է Նարեկ Կարապետյանին մեղադրանք առաջադրելու վերաբերյալ Դատախազության միջնորդությունը, սակայն նրա ազատազրկման վերաբերյալ հարցը դեռևս չի լուծվել և կքննարկվի այսօր՝ ժամը 15:30-ին։ ԿԸՀ նիստից հետո լրագրողների հետ զրույցում այս մասին հայտարարեց փաստաբան Արամ Վարդևանյանը:

Նրա խոսքով՝ որոշումը վերաբերում է բացառապես մեղադրանք առաջադրելու համաձայնությանը և չի նշանակում, որ Նարեկ Կարապետյանը զրկվել է պատգամավորական անձեռնմխելիությունից ամբողջությամբ։

«Սա չի հանդիսանում անձեռնմխելիությունից ընդհանրապես զրկում։ Սա վերաբերում է մեղադրանք տալուն համաձայնությանը»,- ասաց նա:

Վարդևանյանի խոսքով՝ նիստում քննարկվել է նաև հարցը` արդյոք ԿԸՀ-ն կարող է համաձայնություն տալ Նարեկ Կարապետյանի նկատմամբ որպես խափանման միջոց կալանք ընտրելուն: Արամ Վարդևանյանը նշեց, որ իրենք ներկայացրել են ինչպես սահմանադրաիրավական, այնպես էլ քաղաքական բնույթի հակափաստարկներ՝ հղում անելով Սահմանադրական դատարանի որոշումներին։

Ըստ Վարդևանյանի՝ Նարեկ Կարապետյանն արդեն իսկ պատգամավորի կարգավիճակ ունի, թեև դեռևս չի ստանձնել լիազորությունները։

Նա նաև պնդեց, որ Դատախազությունը բավարար իրավական հակափաստարկներ չի ներկայացրել իրենց դիրքորոշման դեմ և ընդգծեց, որ Սահմանադրական դատարանի որոշումների համաձայն՝ պատգամավորի կարգավիճակ ձեռք բերելու պահից անձը չի կարող ազատազրկվել առանց համապատասխան սահմանադրական ընթացակարգերի։

Նրա գնահատմամբ՝ Նարեկ Կարապետյանի նկատմամբ իրականացվող գործընթացը քաղաքական ենթատեքստ ունի և ուղղված է նաև «Ուժեղ Հայաստան» ձևավորվող խմբակցության գործունեությունը խաթարելուն, որտեղ, նրա խոսքով, Կարապետյանն առանցքային դերակատարում ունի։

ԿԸՀ-ն Նարեկ Կարապետյանի ազատազրկման վերաբերյալ միջնորդության քննարկումը կշարունակի այսօր՝ ժամը 15:30-ին։ Այդ քննարկման արդյունքներով էլ պարզ կդառնա՝ արդյոք հանձնաժողովը կհամաձայնի նաև նրա նկատմամբ կալանքը որպես խափանման միջոց կիրառելուն։

Մանրամասները` տեսանյութում:

Արփի Հակոբյան