21.10.2026 | 22:48
Սրբուհի Գալյանը Թուրքիայում քննարկմանը ներկայացրել է Հայաստանում արդարադատության ոլորտի բարեփոխումները
«Քվանտ» վարժարանը ևս երեք տարի կկարողանա անգլերենով իրականացնել IB ծրագիրը
Հասարակություն
22.07.2026 | 17:56
Կառավարության հուլիսի 23-ի նիստի օրակարգում է «Քվանտ» վարժարանին 3 տարի ժամկետով հանրակրթությունն օտար լեզվով՝ անգլերենով կազմակերպելու թույլտվություն տալու հարցը։ Հայաստանի հանրակրթության ընդհանուր կանոններով կրթությունը կազմակերպվում է հայերենով։ Օտար լեզվով կրթություն իրականացնելու համար անհրաժեշտ է օրենքով և կառավարության համապատասխան որոշմամբ նախատեսված հատուկ թույլտվություն։
Թույլտվությունը վերաբերելու է ոչ թե վարժարանի բոլոր դասարաններին, այլ միջնակարգ կրթության երրորդ աստիճանին՝ 11-րդ և 12-րդ դասարաններում իրականացվող Միջազգային բակալավրիատի «Դիպլոմա» ծրագրին՝ IBDP-ին։
Նախատեսվում է, որ վարժարանը ծրագիրը անգլերենով կշարունակի իրականացնել 2026/2027 ուսումնական տարվանից։
Նշվում է, որ ներկայում վարժարանի 62 դասարաններից ընդամենը երկուսում՝ մեկ 11-րդ և մեկ 12-րդ դասարանում, ուսուցումն իրականացվում է ՄԲ «Դիպլոմա» ծրագրով։ Հետևաբար որոշումը վերաբերում է սահմանափակ թվով ավագ դասարանների և ոչ թե բոլոր՝ ավելի քան 1000 սովորողներին։
«Քվանտը» Միջազգային բակալավրիատի «Դիպլոմա» ծրագիրն իրականացնում է դեռևս 2011 թվականից։ Այդ ժամանակ վարժարանը ստացել էր համապատասխան թույլտվություն և սկսել էր ծրագիրն իրականացնել կառավարության որոշման հիման վրա։
Ծրագրում ընդգրկված սովորողները կարող են ստանալ ինչպես Հայաստանի պետական ավարտական ատեստատ, այնպես էլ միջազգային բակալավրիատի՝ IB Diploma Programme-ի դիպլոմ։
Նախագծի հիմնավորման համաձայն՝ միջազգային ծրագիրը պետք է համատեղվի Հայաստանի հանրակրթության պետական չափորոշչի պահանջների հետ։ Այսպիսով, անգլերենով ուսուցումը չի փոխարինելու պետական կրթական ծրագրին․ սովորողները պետք է կատարեն և՛ ՀՀ կրթական համակարգի, և՛ Միջազգային բակալավրիատի պահանջները։
IBDP-ն միջազգային ճանաչում ունեցող երկամյա ավագ դպրոցական ծրագիր է, որը նախատեսված է հիմնականում 16-19 տարեկան սովորողների համար և «Քվանտում» համապատասխանում է 11-րդ ու 12-րդ դասարաններին։ Գնահատումը կատարվում է Միջազգային բակալավրիատի չափանիշներով, իսկ առավելագույն արդյունքը 45 միավոր է։ Նախագծի հիմնավորման համաձայն՝ «Քվանտի» շրջանավարտների միջին արդյունքները տարիների ընթացքում 4-6 միավորով բարձր են եղել տվյալ ծրագրի համաշխարհային միջինից։
Եվգենյա Համբարձումյան
