27.09.2026 | 22:23
Համաշխարհային օլիմպիադա. Հայաստանի հավաքականները երրորդն են A խմբում. ԼՈՒՍԱՆԿԱՐՆԵՐ
808 արձանագրություն ենք կազմել, 20 անձ բերման է ենթարկվել․ Ավետ Բաբայան․ ՏԵՍԱՆՅՈՒԹ
Հասարակություն
20.07.2026 | 11:42
Երևանի քաղաքապետարանի հուլիսի 20-ի գործակարգավարական խորհրդակցության ընթացքում ներկայացվեցին ապօրինի շինարարությունների, ինքնակամ կառույցների, ապօրինի գովազդների ապամոնտաժման, ինչպես նաև շինարարական հրապարակներում իրականացվող վերահսկողության արդյունքները։
Ըստ զեկույցի՝ հաշվետու ժամանակահատվածում կազմվել է 808 վարչական իրավախախտման արձանագրություն, որոնցից 240-ը՝ քաղաքաշինության և կոմունալ տնտեսության, 568-ը՝ առևտրի և ծառայությունների ոլորտներում։ Առգրավվել է շուրջ 10.5 տոննա վաճառվող ապրանք, իսկ 336 վարչական իրավախախտման փաստով վարչարարություններ են իրականացվում։
Երևանի քաղաքապետարանի աշխատակազմի հասարակական կարգի պահպանության ծառայության պետի պաշտոնակատար Ավետ Բաբայանը նշեց, որ իրականացվել է 28 ինքնակամ կառուցված շինության քանդում, իսկ ներհամայնքային տրանսպորտում արձանագրված խախտումների համար կայացվել է 2160 տուգանքի որոշում։ Նախորդ հաշվետու ժամանակահատվածի համեմատ արձանագրությունների թիվն աճել է 140-ով, առգրավված ապրանքների ծավալը՝ 2 տոննայով, իսկ հանրային տրանսպորտում նշանակված տուգանքների թիվը՝ 1883-ով։
Հուլիսի 11-15-ն անցկացված համատեղ միջոցառումների արդյունքում, որոնք իրականացվել են ՆԳՆ ոստիկանության գվարդիայի հետ, Երևանում օրենսդրության խախտմամբ վճարովի ավտոկայանատեղեր կազմակերպելու համար ոստիկանություն բերման է ենթարկվել 20 անձ։
Մանրամասները՝ տեսանյութում։
