Փաշինյանին «վառելու» կոչ անողի գործը կես ամսում ուղարկվել է դատարան, Գարեգին Բ-ին «քարով սատկացնելու» կոչը լեզվաբաններն են ուսումնասիրում

Ամենայն Հայոց կաթողիկոս Գարեգին Բ-ին «քարով սատկացվելու» կոչ արած Նիկոլ Փաշինյանի աջակից Էդվարդ Ստեփանյանը դեռևս որևէ կարգավիճակ չունի։ Գլխավոր դատախազությունից Factor.am–ի հարցմանն ի պատասխան հայտնեցին, որ նախաքննությունը շարունակվում է, նշանակված են փորձաքննություններ։

Factor.am-ին հայտնի դարձավ, որ նշանակված է լեզվաբանական փորձաքննություն։ Ենթադրվում է, որ փորձաքննության նպատակն է պարզել՝ արդյո՞ք «քարով սատկացնելու» հրապարակային խոսքը պարունակում է բռնության կոչ։ Այս հայտարարությունը գառնեցի Էդվարդ Ստեփանյանն արել էր 2025 թվականի դեկտեմբերի 28-ին՝ Նիկոլ Փաշինյանի մասնակցությամբ պատարագի ընթացքում։ Քաղաքացու բռնության կոչը հրապարակել էր ՔՊ-ին պատկանող Civic․am-ը։

Ուշագրավ է, որ շուրջ ութ ամիս անց իրավապահները չեն դրսևորում այն շտապողականությունը, ինչին ականատես ենք լինում Նիկոլ Փաշինյանին սոցիալական ցանցերի միջոցով ուղղված բռնության կոչերի դեպքում։

Factor․am-ը «Դատալեքս» համակարգից տեղեկացել էր, որ 2026 թվականի մայիսի 29-ին Շիրակի մարզի բնակիչ Ա.Ս.-ի նկատմամբ հանրային քրեական հետապնդում է հարուցվել այն բանի համար, որ նա Նիկոլ Փաշինյանի լուսանկարի տակ ֆեյսբուքյան էջով կատարել է հետևյալ գրառումը. «Ողջ-ողջ մեր ծնողներիս առաջ ՎԱՌԵԼ այս տականքին, թուրքի վիժվածքին»: Ա.Ս.-ին մեղադրանք ներկայացնելուց հետո նրա նկատմամբ բացակայելու արգելք է կիրառվել, ապա ընդամենը կես ամիս անց գործն ուղարկվել է դատարան՝ ըստ էության քննության:

Ստացվում է՝ իրավապահները ՀՀ վարչապետին ուղղված բռնություն պարունակող հրապարակային խոսքի դեպքում գործել են շատ արագ, իսկ Ամենայն Հայոց կաթողիկոսին ուղղված բռնության հրապարակային խոսքը կես տարուց ավելի ուսումնասիրում են։

Նարեկ Կիրակոսյան