Ստրասբուրգում քննարկվել են ազատազրկվածների իրավունքների պաշտպանության նոր չափանիշները

Մարդու իրավունքների պաշտպան Անահիտ Մանասյանը հուլիսի 6-10-ը Ստրասբուրգում մասնակցել է Եվրոպայի խորհրդի Խոշտանգումների կանխարգելման կոմիտեի (CPT) 120-րդ լիագումար նիստին։ Նիստում ընդունվել են ազատազրկված կանանց և ներգաղթային կալանքի վերաբերյալ նոր չափանիշներ, որոնք կոչված են ամրապնդելու այդ խմբերի իրավունքների պաշտպանությունը։

«Մարդու իրավունքների պաշտպան Անահիտ Մանասյանը հուլիսի 6–10-ը Ստրասբուրգում մասնակցել է Եվրոպայի խորհրդի Խոշտանգումների և անմարդկային կամ արժանապատվությունը նվաստացնող վերաբերմունքի կամ պատժի կանխարգելման կոմիտեի (ԽԿԿ/CPT) 120-րդ լիագումար նիստին` որպես Կոմիտեի` Հայաստանը ներկայացնող անդամ։

Նիստի ընթացքում Կոմիտեն քննարկել և ընդունել է մի շարք երկրներ իրականացված այցերի վերաբերյալ զեկույցներ։ Կոմիտեն նաև ընդունել է ազատազրկված կանանց և ներգաղթային կալանքի վերաբերյալ նոր չափանիշներ։ Այս չափանիշներով ԽԿԿ-ն լրացուցիչ հստակեցնում է այն պահանջները, որոնք պետք է կիրառվեն ազատությունից զրկված անձանց այս երկու խմբերի նկատմամբ՝ ազգային իշխանություններին տրամադրելով լրացուցիչ ուղեցույցներ նրանց իրավունքների պաշտպանության չափանիշների առնչությամբ»,- ասված է հաղորդագրությունում։

Հիշեցնենք, որ Անահիտ Մանասյանը Եվրոպայի խորհրդի Խոշտանգումների և անմարդկային կամ արժանապատվությունը նվաստացնող վերաբերմունքի կամ պատժի կանխարգելման կոմիտեի (CPT)՝ Հայաստանը ներկայացնող անդամ է ընտրվել 2023 թվականի նոյեմբերի 29-ին՝ Եվրոպայի խորհրդի Նախարարների կոմիտեի որոշմամբ։ CPT-ն պարբերաբար այցելում է անդամ պետություններ՝ գնահատելու ազատությունից զրկված անձանց պահման պայմաններն ու նրանց նկատմամբ վերաբերմունքը, ինչպես նաև առաջարկություններ է ներկայացնում խոշտանգումների և անմարդկային վերաբերմունքի կանխարգելման ուղղությամբ։