Ընդդիմադիր ուժերի առաջնորդների հետ հանդիպել եմ, գաղտնի պլան ունենք. Սամվել Կարապետյան․ ՏԵՍԱՆՅՈՒԹ

«Ուժեղ Հայաստան» դաշինքի առաջնորդ Սամվել Կարապետյանը դատարանի բակում լրագրողների հետ զրույցում անդրադարձել է Ազգային ժողով մտնել-չմտնելու հարցին՝ նշելով, որ վերջնական որոշում դեռ չի կայացվել։

Նրա խոսքով՝ դաշինքը կընտրի այն ճանապարհը, որը, իրենց գնահատմամբ, ամենաարագը կհանգեցնի վարչապետ Նիկոլ Փաշինյանի հեռացմանը։

«Կգնահատենք, թե որ ճանապարհը հնարավորություն կտա արագ հեռացնել Փաշինյանին, այդ ճանապարհն էլ ընտրելու ենք։ Չենք նայելու ոչ մեկի՝ դաշտ գցած նարատիվներին կամ խորհուրդներին։ Ի վիճակի ենք մեր որոշումները ինքնուրույն կայացնել։ Կշփվենք մեր ընտրողների և թիմի հետ ու կընդունենք միակ ճիշտ որոշումը»,- ասել է Կարապետյանը։

Նա նաև նշել է, որ, ըստ իրենց գնահատականի, դաշինքի ընտրողների շուրջ 40 տոկոսը դեռևս դեմ է պատգամավորական մանդատներ վերցնելուն, մինչդեռ 60 տոկոսը կարծում է, որ «Ուժեղ Հայաստանը» պետք է մտնի խորհրդարան։

Անդրադառնալով ՀԷՑ ժամանակավոր կառավարիչ Ռոմանոս Պետրոսյանի հայտարարությանը, թե հուլիսին «Հայաստանի էլեկտրական ցանցերը» կպետականացվեն, Կարապետյանն ասել է. «Լուրջ մի ընդունեք։ Իրենք արդեն ՀԷՑ-ը «գցել են իրենց ոտքերին», բոլոր ցուցանիշները կատաստրոֆիկ են։ Կարծում եմ՝ իրենք հիմա շատ ուրախ կլինեին, եթե այդ քայլերը ձեռնարկած չլինեին»։ Իշխանափոխության հնարավոր ժամկետների վերաբերյալ հարցին Կարապետյանը պատասխանել է, որ այդ հարցում ունի իր ժամանակացույցը՝ հավելելով. «Դա բոլորդ կտեսնեք»։

Մանրամասները` տեսանյութում։