28.09.2026 | 00:15
ՔՊ, 95.1%. Սուրեն Թումանյանը վերընտրվեց Թումանյանի համայնքապետի պաշտոնում. Լոռու մարզպետ
Նախատեսվում է ստեղծել ևս 8 կամավորական հրշեջ-փրկարարական հենակետ․ ՓԾ տնօրենն ընդունել է Ավստրիական Կարմիր խաչի և Հայկական Կարմիր խաչի ընկերությունների ներկայացուցիչներին
Հասարակություն
26.06.2026 | 20:44
Հունիսի 24-ին Փրկարար ծառայության տնօրեն-ՆԳ նախարարի տեղակալ Արամ Ղազարյանն ընդունել է Ավստրիական Կարմիր խաչի և Հայկական Կարմիր խաչի ընկերությունների ներկայացուցիչներին։ Քննարկվել են «Հայաստանի Հանրապետությունում առաջին արձագանքման կամավորական ծառայության ինստիտուցիոնալացում» (Volfire) ծրագրի շրջանակում իրականացված աշխատանքներն ու հետագա համագործակցության հեռանկարները։ Այդ մասին հայտնում են ՆԳՆ-ից:
«Արամ Ղազարյանը բարձր է գնահատել ծրագրի շրջանակում իրականացված համատեղ գործունեությունը՝ ընդգծելով հանրապետության տարբեր մարզերում ստեղծված 11 կամավորական հրշեջ-փրկարարական հենակետերի կարևորությունը, որոնք էական դեր են կատարում արտակարգ իրավիճակների ժամանակ համայնքների դիմակայունության բարձրացման գործում։ Այդ համատեքստում նշել է, որ ևս երկու կամավորական հրշեջ-փրկարարական հենակետերի կառուցումը ավարտական փուլում է։
Փրկարար ծառայության տնօրենը կարևորել է կամավորների ներուժի արդյունավետ օգտագործումը՝ նշելով, որ նրանք աղետների ռիսկերի նվազեցման, արտակարգ իրավիճակներին արագ արձագանքելու գործում առանձնակի նշանակություն ունեն։
Արամ Ղազարյանի խոսքով՝ ծրագրի շրջանակում կազմակերպված վերապատրաստումները զգալիորեն նպաստել են կամավոր հրշեջ-փրկարարների մասնագիտական պատրաստվածության բարձրացմանը։
Volfire ծրագրի ղեկավար Թիերի Ժիրարդը ներկայացրել է ծրագրի ընթացիկ արդյունքները և նշել, որ արդեն մեկնարկել են երկրորդ փուլի նախապատրաստական աշխատանքները։ Նրա խոսքով՝ հաջորդ փուլում նախատեսվում է ստեղծել ևս 8 կամավորական հրշեջ-փրկարարական հենակետ, ինչը կնպաստի կամավորության ինստիտուտի առավել լայն տարածմանն ու ամրապնդմանը։
Հայկական Կարմիր խաչի ընկերության աղետների կառավարման բաժնի ղեկավար Սերգեյ Սահակյանը ևս կարևորել է Փրկարար ծառայության և գործընկեր կազմակերպությունների միջև ձևավորված արդյունավետ համագործակցությունը։
Կողմերը համագործակցությունը շարունակելու պատրաստակամություն են հայտնել»,- ասվում է հաղորդագրությունում։
