28.09.2026 | 00:15
ՔՊ, 95.1%. Սուրեն Թումանյանը վերընտրվեց Թումանյանի համայնքապետի պաշտոնում. Լոռու մարզպետ
2 տարվա ընթացքում 366 օր ՀՀ-ում բնակվելու պահանջ․ կառավարությունը ընտրելու իրավունքից օգտվելու նոր կանոն է առաջարկում
Հասարակություն
25.06.2026 | 11:45
Կառավարությունը դեմ չէ ընտրական իրավունքի սահմանափակման գաղափարին, բայց առաջարկում է այլ չափանիշներ։
ԱԺ ՔՊ-ական պատգամավորներ Արուսյակ Ջուլհակյանը, Հասմիկ Հակոբյանը և Ալխաս Ղազարյանն առաջարկում են «Ընտրական օրենսգիրք» և «Հանրաքվեի մասին» սահմանադրական օրենքներում փոփոխություններ, որոնցով մեկ տարվա ընթացքում 183 օրից քիչ ՀՀ-ում գտնվողները կզրկվեն ընտրություններին մասնակցելու իրավունքից։
Բացառություն է նախատեսվում պետական ծառայության բերումով արտերկրում գտնվող անձանց և արտերկրում սովորող ուսանողների համար։
Կառավարությունը սկզբունքորեն ընդունելի է համարում նախաձեռնությունը, սակայն առաջարկում է մեկ տարվա փոխարեն դիտարկել երկու տարվա ժամանակահատված, որի ընթացքում քաղաքացին պետք է Հայաստանում գտնված լինի առնվազն 366 օր։ Նման կարգավորում է առաջարկում ՆԳՆ-ն։
Ըստ հիմնավորման՝ մեկ տարվա շրջանակը կարող է բավարար չլինել քաղաքացու և պետության միջև իրական ու կայուն կապը գնահատելու համար, իսկ կարճատև բացակայությունները կարող են անհիմն կերպով զրկել ընտրական իրավունքից։ Կառավարությունն առաջարկում է նույնատիպ նստակեցության ցենզ սահմանել նաև տեղական ինքնակառավարման մարմինների ընտրությունների համար։
Միաժամանակ, առաջարկվում է հստակեցնել Հայաստանում քաղաքացիների փաստացի գտնվելու մասին տվյալների ստուգման ձևաչափը։ Որպես հնարավոր տարբերակներ նշվում են սահմանահատումների տվյալների օգտագործումը և սահմանային էլեկտրոնային համակարգերի համադրումը ընտրողների ռեգիստրի հետ։
Գործադիրը նաև առաջարկում է բացառությունների ցանկում ընդգրկել արտերկրում բնակվող այն քաղաքացիներին, որոնք Հայաստանի դիվանագիտական կամ հյուպատոսական ներկայացուցչություններում ծառայող անձանց ընտանիքի անդամներ են։
Եթե Ազգային ժողովն ընդունի այս կարգավորումները, ապա Հայաստանում ընտրական իրավունքի իրացումը կարող է կապվել ոչ միայն քաղաքացիության և տարիքային շեմի, այլև երկրում փաստացի բնակության և գտնվելու տևողության հետ։
Նարեկ Կիրակոսյան
