16.11.2024 | 12:34
Վահագն Խաչատուրյանը ԿԽՄԿ նախագահի հետ քննարկել է գերիներին և անհետ կորածների հարցեր
Վիգեն Սարգսյանը Նիկոլ Փաշինյանին երկկողմ բանավեճի է հրավիրում
Քաղաքականություն
28.11.2018 | 14:52
Հանրապետական կուսակցության առաջին փոխնախագահ, կուսակցության համամասնական ցուցակը գլխավորող Վիգեն Սարգսյանը վարչապետի պաշտոնակատար Նիկոլ Փաշինյանին բանավեճի է հրավիրում:
«Հաշվի առնելով, որ արդեն երրորդ օրն է Ձեր քարոզարշավը կառուցում եք ժողովուրդը հանրապետականներով վախեցնելու վրա, խորացնելով հասարակությունը սևերի և սպիտակների կիսելու Ձեր արատավոր քաղաքականությունը, ինչպես նաև այն, որ քարոզչության ընթացքում թույլ եք տալիս ամենատգեղ և անվայել ձևով գռեհկացնել ընտրական գործընթացը, պահպանելով ընտրություններին մասնակցող բոլոր կուսակցությունների 1-ին համարների Հանրայինում կազմակերպվող բանավեճին մասնակցելու հանձնառությունս, այնուամենայնիվ անհրաժեշտ եմ համարում առանձին երկկողմ բանավեճ ՀՀԿ – Իմ քայլ ձևաչափով` 1-ին համարների մակարդակով:
Առաջարկում եմ բանավեճն անցկացնել երեք հեռուստաալիքներով (հանրային և մեկական Ձեր և իմ ընտրությամբ), երկու հաղորդավարով (մեկական` Ձեր և իմ ընտրությամբ), 4–6 թեմաներով (կեսը Ձեր, կեսն էլ իմ ընտրությամբ), իրար հարցեր ուղղելու հնարավորությամբ: Հաշվի առնելով Ձեր գերծանրաբեռնվածությունը` բանավեճի օրվա ընտրությունը թողնում եմ Ձեր հայեցողության»,- դիմելով Նիկոլ Փաշինյանին՝ իր Ֆեյսբուքյան էջում գրել է Վիգեն Սարգսյանը:
Հիշեցնենք՝ ավելի վաղ Հայաստանի վարչապետի պաշտոնակատար Նիկոլ Փաշինյանն ինքն էր առաջարկել, որ առաջիկա ԱԺ ընտրություններին մասնակցող
բոլոր ուժերի առաջին դեմքերը բանավիճեն ուղիղ եթերում։
«Կարծում եմ՝ առաջիկա խորհրդարանական ընտրություններում պետք է հիմք դրվի մի կարեւոր ավանդույթի, որը հետագայում պետք է ամրագրվի նաեւ օրենսդրությամբ։ Բանավեճ ուղիղ եթերում՝ ընտրություններին մասնակցող բոլոր ուժերի առաջին դեմքերի մասնակցությամբ», – գրել էր Փաշինյանն իր ֆեյսբուքյան էջում:
