Լավ են պատրաստված եղել և, ցավոք, չեն թողել հետքեր. ԱԱԾ պետը մանրամասներ է ներկայացնում գաղտնալսման գործից

Ազգային անվտանգության տնօրենին և Հատուկ քննչական ծառայության պետին գաղտնալսողների մոտավոր շրջանակը պարզ է, սակայն չկան փաստական ապացույցներ: Այս մասին այսօր Հատուկ քննչական ծառայությունում լրագրողների հետ զրույցում հայտարարեց ԱԱԾ տնօրեն Արթուր Վանեցյանը:

«Մարդիկ, որոնք արել են այդ գործը, ի սկզբանե իմացել են, որ Ազգային անվտանգության ծառայությունը և ողջ իրավապահ համակարգը ջանք և եռանդ չեն խնայելու գործը բացահայտելու համար: Իրենք շատ լավ են պատրաստված եղել և, ցավոք, չեն թողել հետքեր, որոնցով կկարողանանք մեղադրանքներ ներկայացնել մարդկանց»,- հայտնեց Արթուր Վանեցյանը:

Ըստ ԱԱԾ տնօրենի՝ Ազգային անվտանգության ծառայությունն իրականացնում է օպերատիվ աշխատանք և օպերատիվ աշխատանք իրականացնելու ժամանակ ԱԱԾ-ի հետ գաղտնի հիմունքներով համագործակցում են տարբեր անձինք, որոնց աշխատանքը չի երևում, սակայն անգնահատելի է: Այդ մարդկանցից օպերատիվ եղանակով ստացվում է տեղեկություն, բայց չի լինում այդ տեղեկությունը փաստաթղթավորել, այսինքն՝ ունենալ հստակ տվյալներ, որոնք կարող ես տրամադրել քննչական մարմնին: Արթուր Վանեցյանը դժվարացավ ասել՝ կկարողանա՞ն փաստագրել և քրեական պատասխանտվության ենթարկել այդ մադկանց, ասաց՝ ժամանակը ցույց կտա:

«Որևէ մեկի մտքով չէր անցնի, որ կարող են լսել ԱԱԾ տնօրենին և ՀՔԾ պետին, ավելին՝ այդ խոսակցությունները հրապարակեին: Տեղեկատվությունը տարածելու և հետքեր չթողնելու համար իրենք գործել են շատ զգույշ, սեպտեմբերի 6-ից տեղադրվել է և տարածվել, ինչն էլ պատճառ է, որ չենք կարողանում գտնել»,- պարզաբանեց Վանեցյանը՝ նաև տեղեկացնելով, որ տեսանյութը համացանց է ներբեռնվել Իսպանիայից:

Հիշեցնենք՝ սեպտեմբերի 11-ին համացանցում հայտնվեց Հայաստանի Ազգային անվտանգության ծառայության տնօրեն Արթուր Վանեցյանի և Հատուկ քննչական ծառայության պետ Սասուն Խաչատրյանի հեռախոսազրույցի ձայնագրությունը: Վանեցյանը և Խաչատրյանը 8-րոպեանոց հեռախոսազրույցի ընթացքում քննարկում էին Հայաստանի նախկին նախագահ Ռոբերտ Քոչարյանի կալանքը, ինչպես նաև ՀԱՊԿ գլխավոր քարտուղար Յուրի Խաչատուրովի և ՊՆ նախկին ղեկավար Միքայել Հարությունյանի դեմ հարուցված քրեական գործերը։