22.10.2026 | 10:17
Մոսկվան ու Մոսկվայի մարզը 630 ուկրաինական ԱԹՍ է գրոհել․ տուժածներ կան
«Ինչ-որ նոր գործ են կրկին հորինել և կարել»․ ձերբակալված Ռուբեն Հակոբյանն արդեն Քննչական կոմիտեում է
Հասարակություն
19.06.2026 | 14:20
Ազգային ժողովի նախկին պատգամավոր Ռուբեն Հակոբյանն արդեն ձերբակալվել է և այս պահին Քննչական կոմիտեում է։ Կառույցից դեռ մանրամասներ չեն հայտնում, թե քրեական որ վարույթի շրջանակներում են գործողությունները կատարվում։
Նրա որդին՝ Երևանի ավագանու «Մայր Հայաստան» խմբակցության նախկին անդամ Սամվել Հակոբյանը տեսանյութ էր հրապարակել, նշելով․ «Ինչ-որ նոր գործ են կրկին հորինել և կարել հորս՝ քաղաքական հարցազրույցների, արտահայտությունների համար են դրել ինչ-որ նոր քրեական գործ։ Իմ հայրը ո՛չ հանցագործ է, ո՛չ կոռուպցիոներ է, մեր տանն առհասարակ հանցագործներ չկան, բայց հենց այս պահին իմ ընտանիքի վրա միայն երևի մի հինգ-վեց տարբեր տեսակի դատական գործեր կան։ Մենք տեսնում ենք՝ ինչպես է վարչական ռեսուրսը մսխվում, ինչպես է քրեաիրավական ուժային կառույցները օգտագործվում ռեպրեսիաների համար։ Մենք ապրում ենք մի երկրում, որում կան շատ հանցագործություններ, շատ ապօրինություններ, բայց դրանց հետևից չեն գնում, գնում են մենակ ընդդիմադիրների հետևից»։
Այսօր առավոտյան դաշնակցական նախկին պատգամավորը ֆեյսբուքյան էջում գրել էր, որ եկել են իրեն ձերբակալելու։
Հիշեցնենք՝ Ռուբեն Հակոբյանի նկատմամբ դեռևս նախորդ տարի էր քրեական հետապնդում սկսվել հարցազրույցներից մեկում հնչեցված խոսքի համար։ ՔԿ-ն իշխանությունը զավթելուն ուղղված հրապարակային կոչի հոդվածի հատկանիշներով մեղադրանք էր առաջադրել:
Ռոզա Վարդանյան
