16.06.2026 | 20:15
Իրանի մաքսային ծառայության ղեկավարի հետ քննարկվել են Մեղրի-Նորդուզ սահմանային անցակետերի գործունեության հարցեր
«Հորն ու մորն էլ չի ճանաչում»․ մանրամասներ թմրանյութից տուժած 12-ամյա տղայի վիճակի մասին
Հասարակություն
16.06.2026 | 19:10
Արագածոտնի մարզի Օրգով համայնքի բնակիչ 12-ամյա աշակերտը, որի օրգանիզմում շուրջ 2 շաբաթ առաջ թմրանյութ է հայտնաբերվել, հիշողության հետ խնդիրներ ունի։ Այս մասին Factor TV-ի հետ զրույցում ասաց համայնքի վարչական ղեկավար Արայիկ Մանուկյանը։
«Հա՛, ասում է՝ հիշողությունս կորել է։ Հորն ու մորն էլ, ասում են, չի ճանաչում»,-նշեց Մանուկյանը։ Տղան 10 օրից ավելի ծանր վիճակում եղել է հիվանդանոցում։ «Երեխան առավոտը գնացել է էքսկուրսիա, նորմալ գնացել է։ Էքսկուրսիայից հետ գալուց արդեն վատ է եղել։ Տարել են հիվանդանոց, պարզվել է, որ օրգանիզմում թմրանյութ կա»,- պատմեց Մանուկյանը։ Հարազատները, ըստ վարչական ղեկավարի, չեն հասկանում՝ ինչպես կարող էր թմրանյութը հայտնվել երեխայի մոտ։ «Չգիտեն, իրենք էլ չգիտեն, ամբողջ գյուղի համար աբսուրդ է»,- ասաց նա։
Վարչական ղեկավարը նաև հայտնեց, որ 12-ամյա տղան այժմ հոգեբանի է այցելում։
Դեպքի հանգամանքների վերաբերյալ տարբեր տեղեկություններ են շրջանառվում։ Ավելի վաղ Արագածոտնի մարզի առողջապահության և սոցիալական ոլորտի հարցերի վարչության պետ Կարեն Թաթուլյանը Aravot.am-ին հայտնել էր, որ անձնապես, ոչ ի պաշտոնե, փորձել է մանրամասներ պարզել Օրգով համայնքի 12-ամյա աշակերտին թմրանյութ տալու դեպքով և պարզել է, որ երեխան թմրանյութը ձեռք է բերել անձամբ, տելեգրամյան ալիքով կապվելով. «Ինձ ասացին, որ երեխան հեռախոսով տելեգրամյան ինչ-որ ալիքից ինքն է առել, էքսկուրսիան դրա հետ կապ չունի»:
Աշակերտին քաղցրավենիքի միջոցով թմրանյութ տալու գործով հանրային քրեական հետապնդում է հարուցվել մեկ անձի նկատմամբ։
Քննչական կոմիտեից ավելի վաղ հայտնել էին, որ դեպքի առթիվ ՀՀ ՔԿ Արագածոտնի մարզային քննչական վարչությունում 2026 թվականի հունիսի 7-ին նախաձեռնված քրեական վարույթի նախաքննության ընթացքում մեկ անձի նկատմամբ հանրային քրեական հետապնդում է հարուցվել:
Նրա նկատմամբ տնային կալանքը որպես խափանման միջոց կիրառելու վերաբերյալ միջնորդություն է ներկայացվել դատարան, սակայն այն մերժվել է։ Որպես խափանման միջոց է կիրառվել բացակայելու արգելքը։
Քրեական վարույթով նշանակվել են փորձաքննություններ, իրականացվել են անհետաձգելի ապացուցողական և վարութային գործողություններ։
Նախաքննությունը շարունակվում է։
Եվգենյա Համբարձումյան
