«Եթե հանկարծ արտահանձնվի, նրա կյանքին վտանգ կսպառնա». ՀՀ-ում բելառուս իրավապաշտպան է ձերբակալվել

Միջազգային համաժողովին մասնակցելու համար Հայաստան ժամանած Բելառուսի քաղաքացի, իրավապաշտպան Վիկտոր Կլիմուսն այսօր առավոտյան «Զվարթնոց» օդանավակայանում ձերբակալվել է։ Այս մասին Factor.am-ի հետ զրույցում ասաց Երևանի ավագանու նախկին անդամ, «Հայ առաջադեմ երիտասարդություն» ՀԿ-ի նախագահ Գրիգոր Երիցյանը։

«Վիկտոր Կլիմուսը Հայաստան է ժամանել Լեհաստանից, որտեղ տևական ժամանակ բնակվում է, քանի որ Բելառուսում քաղաքական հետապնդման էր ենթարկվում, բազմաթիվ քրեական գործեր էին նախաձեռնել, ահաբեկչության հոդված էին դրել նրա վրա։ Կլիմուսը երկար տարիներ իրավապաշտպան է եղել Բելառուսում, Հայաստան է եկել մասնակցելու վաղը մեկնարկող միջազգային համաժողովի, նախատեսված էր, որ պետք է մեկ շաբաթ ՀՀ-ում մնար, բայց Վարշավա-Երևան ինքնաթիռի վայրէջք կատարելուց հետո ձերբակալվել է հայ իրավապահներին կողմից»։

Բելառուսի լրատվամիջոցները գրում են, որ ձերբակալությունը պայմանավորված է այն հանգամանքով, որ Կլիմուսի անունը ներառված է միջազգային հետախուզվողների ցուցակում։

«Վիկտոր Կլիմուսն ահաբեկիչ կամ հանցագործ չէ, երկար ժամանակ է ապրում և պաշտպանություն է ստացել Եվրոպայում։ Ստացվում է՝ Եվրոպական Միությունը պաշտպանություն է տրամադրել այս անձին, իսկ ԵՄ ձգտող Հայաստանը ձերբակալել է նրան՝ կատարելով Բելառուսի ավտորիտար ռեժիմի ապօրինի պահանջը: Մենք մտածել ենք՝ ՀՀ-ն ապահով կլինի, այնինչ տեսնում ենք, որ մեր երկիրը հակված է կատարելու ապօրինի պահանջները։ Հույս ունեմ՝ տեղի ունեցածը թյուրիմացություն է, պարզապես նրա անունը եղել է դատաբազայում, կատարել են զուտ իրավական գործընթացը և կարճ ժամանակում ազատ կարձակվեն, հակառակ դեպքում լուրջ մտահոգություններ կառաջանան նրա արտահանձնման մասով. Բելառուսում նա քաղբանտարկյալ է, եթե հանկարծ արտահանձնվի, նրա կյանքին վտանգ կսպառնա։ Հայաստանը Բելառուս չէ և չպետք է ձևավորի մի երկրի հեղինակություն, որտեղ քաղաքական հետապնդումներից փախած մարդիկ չեն գտնում պաշտպանություն, այլ բախվում են նույն հետապնդումների վտանգին, որոնցից փորձել են փրկվել»,- նշեց Երիցյանը։

Factor.am-ը դիմեց Ներքին գործերի նախարարություն՝ Վիկտոր Կլիմուսի ձերբակալման պատճառն ու հետագա գործողությունների մասին տեղեկություն ստանալու։ Իրավապահ կառույցից պատասխան ստանալուն պես՝ կհրապարակենք։

Ռոզա Վարդանյան