Ոչ մի գյումրեցի նման քայլի չէր գնա. մարզպետը` «Մայր Հայաստան» հուշահամալիրի տառերը պոկելու մասին. ՏԵՍԱՆՅՈՒԹ

Շիրակի մարզպետ Դավիթ Առուշանյանը Factor TV-ի հետ զրույցում խիստ դատապարտել է Գյումրիում «Մայր Հայաստան» հուշահամալիրի տարածքում ռուսական քաղաքների անվանումներով տառերի վնասման դեպքը՝ այն որակելով վանդալիզմ։

Առուշանյանի խոսքով՝ անկախ այնտեղ առկա գրություններից, հուշահամալիրը Գյումրու պատմամշակութային և զբոսաշրջային կարևոր վայրերից է, ուստի նման գործողությունն անընդունելի է։ Նա նշել է, որ իրավապահ մարմինների հետ աշխատանք է տարվում՝ դեպքի հանգամանքները պարզելու համար։

Մարզպետը հայտնել է, որ վնասված տառերը արագ հայտնաբերվել են, և արդեն իրականացվում են դրանց վերականգնման ու տեղադրման աշխատանքները։

Խոսելով հնարավոր շարժառիթների մասին՝ Առուշանյանը նշել է, որ իր գնահատմամբ կա երկու վարկած․ կամ գործ ունենք սովորական վանդալիզմի հետ, կամ փորձ է արվում հետընտրական գործընթացների ֆոնին հակառուսական տրամադրությունների իմիտացիա ստեղծել և նման պատկեր ներկայացնել Գյումրիում։

«Վստահ ասում եմ՝ ոչ մի գյումրեցի նման քայլի չէր գնա, որովհետև դա մեր քաղաքինն է, իսկ մեր քաղաքի պատմամշակութային վայրերը գյումրեցիները սրբորեն պաշտպանում են»,- ասել է նա։

Անդրադառնալով հարցին, թե ում կարող էր ձեռնտու լինել հակառուսականության թեման առաջ մղելը, Առուշանյանը նշել է, որ չի կարող կոնկրետ գնահատական տալ, սակայն հավելել է, որ որոշ բլոգերներ և դեղին մամուլի ներկայացուցիչներ փորձել են դեպքը ներկայացնել այդ համատեքստում։

Նրա համոզմամբ՝ նման փորձերը հաջողություն չեն ունենալու, և Գյումրիի վերաբերյալ նման պատկեր ձևավորել չի ստացվի։

Մանրամասները` տեսանյութում։

Նարեկ Կիրակոսյան