28.09.2026 | 02:28
«Արդարացում չունեցող կոպիտ սխալ». Թաթա Սիմոնյանը ներողություն է խնդրել սեպտեմբերի 27-ին իր համերգի ցուցադրության համար
ՆԳՆ-ն 304,7 մլն դրամի՝ ձեռնաշղթաներ ձեռք կբերի․ հայտնի է օգտագործման նպատակը
Հասարակություն
11.06.2026 | 18:21
Ներքին գործերի նախարարությունը 304,7 մլն դրամ կհատկացնի ընտանեկան բռնություն գործադրած անձանց նկատմամբ էլեկտրոնային հսկողության համակարգի ներդրմանը։ Համապատասխան որոշման նախագծով նախատեսվում է ձեռք բերել 120 էլեկտրոնային ձեռնաշղթայի հավաքածու, որոնք թույլ կտան ոստիկանությանը GPS համակարգի միջոցով առցանց հետևել սահմանված սահմանափակումների պահպանմանը և խախտումների դեպքում անհապաղ արձագանքել։ Նախագծի հիմնավորման համաձայն՝ էլեկտրոնային հսկողության միջոցների կիրառումը նպատակ ունի բարձրացնել ընտանեկան բռնության կանխարգելման արդյունավետությունը, ապահովել բռնություն գործադրած անձանց նկատմամբ համաչափ վերահսկողություն և ստեղծել ավելի անվտանգ պայմաններ բռնության ենթարկված կամ վտանգի տակ գտնվող անձանց համար։
Ձեռնաշղթաների ձեռքբերման համար անհրաժեշտ գումարը նախատեսվում է վերաբաշխել թվային փոխակերպման ծրագրից դեպի ՆԳՆ կարիքների ապահովման միջոցառում։ Գնումների արդյունքում 2026 թվականի մարտին ՆԳՆ-ն «Արդմոր կոնստրակտ» ՍՊԸ-ի հետ կնքել է 304 մլն 668 հազար դրամ արժողությամբ պայմանագիր, որով յուրաքանչյուր սարքի արժեքը կազմել է շուրջ 2,54 մլն դրամ։
ՆԳՆ-ն նշում է, որ մինչ մրցույթի հայտարարումը ուսումնասիրվել են ինչպես Հայաստանում կիրառվող, այնպես էլ արտասահմանյան մի շարք լուծումներ, այդ թվում՝ լեհական արտադրության սարքավորումներ, ինչպես նաև ֆրանսիական և շվեյցարական ընկերությունների առաջարկները։ Տեխնիկական պահանջների հստակեցումից հետո 2026 թվականի փետրվարին հայտարարվել է գնման ընթացակարգը, որն ավարտվել է պայմանագրի կնքմամբ։
Ծրագիրը բխում է ոստիկանության տեխնիկական վերազինման և բարեփոխումների պետական ռազմավարություններից, որոնք նախատեսում են համայնքային և քրեական ոստիկանության կարողությունների զարգացում և ժամանակակից տեխնոլոգիական միջոցների ներդրում։
Նարեկ Կիրակոսյան
