Գազի սակագնի հնարավոր փոփոխություն չկա. Դավիթ Խուդաթյան․ ՏԵՍԱՆՅՒԹ

«Իմ տպավորությամբ՝ մամուլում մեկնաբանությունները շատ ավելի վատն են, քան իրականում գետնի վրա տեղի ունեցողը, որովհետև գետնի վրա մենք բնականոն հունով գազամատակարարում ենք ստանում և ստանում ենք այն սակագնով, որը սահմանված է, աշխատում ենք գործընկերների հետ այնպես, ինչպես աշխատել ենք նախկինում»,- լրագրողների հետ ճեպազրույցի ժամանակ ասաց Տարածքային կառավարման և ենթակառուցվածքների նախարար Դավիթ Խուդաթյանը։

Նրա պնդմամբ՝ ռիսկերը կառավարվում են, այդ թվում սակագնի ավելացման մասով մտահոգությունները․ «Թույլ տվեք շատ փակագծեր չբացել, մենք մեր ռիսկերը կառավարում ենք, որովհետև այդքան էլ պատկերը այնպիսին չէ, ինչպիսին կարող է տպավորություն ստեղծվել առաջին հայացքից: Ես կարող եմ ասել, որ քաղաքացիները մտահոգվելու առիթ այս պահին այդ առումով չունեն: Մենք պայմանագիր ունենք և այդ պայմանագրի ժամկետը ձմեռվանից էլ հետո է լրանում, միակողմանի պայմանագիր խզելու համար հիմքեր են պետք: Մենք նորմալ աշխատում ենք, ստանում ենք գազը այն սակագնով, որով ստացել ենք, ստանում ենք գազը այն գրաֆիկով, որով ստացել ենք, գործընկերների հետ նորմալ… չէ՛, շատ լավ աշխատանքային հարաբերություններ ունենք, մեր աշխատանքային հարաբերություններում ոչինչ չի փոխվել»։

Տնտեսական հարցերից անցում կատարելով ընտրությունների արդյունքում, Խուդաթյանն անդրադարձավ երեկ համացանցում տարածվող այն տեղեկությանը, թե տեղամասերից մեկում ՔՊ-ն 0 ձայն էր ստացել․

«Այս մեդիատերորը նպատակ ունի տպավորություն ստեղծել, որ մեր իշխանությունը ընտրությունների կազմակերպման մասով նման է Սերժ Սարգսյանի և Ռոբերտ Քոչարյանի իշխանություններին, այսինքն՝ ընտրախարդախ արարիչների իշխանություն: Բնականաբար հասկանում եմ ԲՀԿ-ի գործընկերներին, իրենք շեմային վիճակում են գտնվում, և որոշակի քվեների տեղաշարժ կարող է արդյունք ապահովել իրենց համար: Ես էլ լինեի իրենց տեղը՝ վերահաշվարկի համար կդիմեի: Այդ մասով ֆորսմաժորային ինչ-որ իրավիճակ չունենք: Վերահաշվարկը կարվի, կհասկանանք՝ վերահաշվարկի արդյունքում փոխվո՞ւմ է պատկերը, թե՞ ոչ: Բայց եթե պատկերը նույնիսկ փոխվի, ավելանա ինչ-որ քաղաքական ուժերի կամ պակասի ինչ-որ քաղաքական ուժերից, դա լինելու է մի քանի քվեների համար, այսինքն՝ ընդամենը խոսքը մի քանի քվեի մասին է: Արդեն մինչև այս պահը տեղի ունեցած ճշգրտումների արդյունքում ամենաշատն ավելացել են «Քաղաքացիական պայմանագիր» կուսակցության քվեները: Այսինքն՝ տրամաբանություն չկա նաև այդ առումով, մեկնաբանությունները չեմ հասկանում՝ ինչի մասին են: «Քաղաքացիական պայմանագիր»-ը, օրինակ, ընտրությունները պայմանական ասած կեղծի այնպես, որի արդյունքում իր քվեները, քաղաքացու կողմից ստացված քվեների համար արձանագրվեն, օրինակ, հազարով ավելի ցա՞ծր: Այդտեղ տրամաբանություն չկա: Ըդդիմությունը այս ընտրություններում ձախողվել է»։

Մանրամասները՝ տեսանյութում։