Հայկական արտադրանքը Եվրոպայում արագ սպառվում է, խնդիրը հեռավորությունն է․ Գևորգ Պապոյան․ ՏԵՍԱՆՅՈՒԹ

Մեր ապրանքները որակական առումով մի զգալի մասով չեն զիջում եվրոպական շուկայում առաջարկվող ապրանքներին: Այս մասին ԱԺ-ում հայտարարեց էկոնոմիկայի նախարար Գևորգ Պապոյանը։

«Հայաստանի Հանրապետության ինտենսիվ այգիները բացարձակապես նույնական են Հունաստանի, Իտալիայի, Իսպանիայի, Ֆրանսիայի ինտենսիվ այգիների հետ: Ջերմոցային տնտեսությունների տեխնոլոգիաների տարբերություն նույնպես չկա, և արտադրանքը համապատասխանում է ամենաբարձր ստանդարտներին՝ ունենալով համապատասխան GAP և մյուս բոլոր սերտիֆիկատները: Դա է պատճառը, որ երբ մենք սուբսիդավորում ենք, այն եվրոպական շուկայում արագ վաճառվում է:

Այստեղ խնդիրը հետևյալն է. Հայաստանը ունի աշխարհագրական որոշակի հեռավորություն եվրոպական շուկայից և դեռևս Եվրոպական միության հետ սահմանակից չէ: Այս հեռավորության պատճառով որոշակի տեխնիկական խնդիրներ են առաջանում: Օրինակ՝ ելակը, որն արտադրվում է Հայաստանում, նույն տեխնոլոգիաներով և սածիլներով է, ինչ Ֆրանսիայում: Սակայն ֆրանսիացի ֆերմերը սածիլը հասցնելու համար ծախսում է, ենթադրենք, 500 դոլար, իսկ մերոնք՝ 8000 դոլար, որպեսզի դա բերեն Հայաստան: Հետո մի հատ էլ պետք է արտահանվի. նա ծախսում է 1000 դոլար տեղում հասցնելու համար, մերոնք՝ ևս 8000 դոլար շուկա հասցնելու համար, գումարած մաքսատուրքերը:

Մեր միակ խնդիրն այն է, որ տրանսպորտային ծախսերը բարձր են, ինչը ազդում է գնային մրցունակության վրա, քանի որ որակական մրցունակության խնդիր բացարձակապես չունենք»,-ասաց նա։

Մանրամասները՝ տեսանյութում։