Ում փողերն էին բաժանում ենթադրյալ ընտրակաշառողները. Արթուր Նահապետյանի պարզաբանումը․ ՏԵՍԱՆՅՈՒԹ

Բյուջեի կատարողականի քննարկումից հետո լրագրողների հետ զրույցում Հակակոռուպցիոն կոմիտեի նախագահ Արթուր Նահապետյանը հերքել է այն պնդումները, թե կառույցը զանգվածաբար գաղտնալսում է քաղաքացիներին՝ ընդդիմության կողմից ենթադրյալ ընտրակաշառքի դեպքեր բացահայտելու նպատակով։

Factor TV-ի հարցին ի պատասխան՝ Նահապետյանը նշել է, որ Հակակոռուպցիոն կոմիտեն օպերատիվ տվյալներ է ստանում հանրապետության տարբեր շրջաններից, որոնք վերաբերում են ենթադրյալ կոռուպցիոն բնույթի ընտրական հանցագործություններին։ Նրա խոսքով՝ այդ տվյալների հիման վրա որոշվում են հետագա գործողությունները, իսկ գաղտնի օպերատիվ միջոցառումները, այդ թվում՝ հեռախոսային խոսակցությունների վերահսկումը, իրականացվում են բացառապես օրենքով սահմանված կարգով և դատարանի թույլտվությամբ։

«Մենք չունենք որևէ դեպք, որտեղ առանց դատարանի թույլտվության Հակակոռուպցիոն կոմիտեն կամ որևէ այլ իրավապահ մարմին իրականացրել է գաղտնալսում»,- ասել է նա։

Անդրադառնալով այն հարցին, թե ձայնագրություններում հիշատակվող քաղաքական ուժերի առաջնորդները, մասնավորապես՝ Նարեկ Կարապետյանը կամ Սամվել Կարապետյանը, ներգրավվա՞ծ են արդյոք քրեական վարույթներում կամ հրավիրվել են հարցաքննության, Նահապետյանը նշել է, որ այդ հարցը կախված է յուրաքանչյուր առանձին վարույթով ձեռք բերված ապացույցներից։

Նրա խոսքով՝ եթե որևէ քաղաքական ուժի ղեկավարության վերաբերյալ բավարար ապացույցներ լինեն, ապա կսկսվեն համապատասխան քրեաիրավական գործընթացներ։ Միաժամանակ նա հրաժարվել է մանրամասներ հայտնել՝ ընդգծելով, որ վարույթների մեծ մասը գտնվում է նախաքննության փուլում, և գործում է նախնական քննության գաղտնիության սկզբունքը։ Նահապետյանը վստահեցրել է, որ նոր զարգացումների դեպքում հանրությունը կտեղեկացվի՝ ինչպես նախկինում, պաշտոնական հաղորդագրությունների միջոցով։

Մանրամասները` տեսանյութում։