07.09.2026 | 16:09
Իրանի ԱԳՆ-ն արձագանքել է Վենսի՝ պատերազմի վերաբերյալ հայտարարություններին
«Օսիպյանը հրաժարվել է բուժզննումից․ հացադուլի 14-րդ օրից հետո կյանքը ցանկացած պահի կարող է դադարել»․ փաստաբան
09.06.2026 | 20:39
«Նուբարաշեն» ՔԿՀ-ում արդեն 23 օր հացադուլի մեջ գտնվող Արթուր Օսիպյանը հրաժարվել է բժշկական զննությունից։ Նրա պաշտպան Դավիթ Հովհաննիսյանը Factor TV-ի հետ զրույցում ասաց, որ երկու օր առաջ է այցելել Օսիպյանին, նա եղել է խիստ հյուծված վիճակում։
«Ընդհանրապես արդեն հացադուլավորների մոտ մահվան վտանգ է լինում, երբ անցնում է 14-օրյա շեմը։ Այդ ժամանակ արդեն կյանքը ցանկացած պահի կարող է դադարել»,- ահազանգեց փաստաբանը։
Նա նշեց՝ հացադուլ հայտարարած կալանավորները պետք է լինեն բժիշկների մշտական վերահսկողության ներքո կամ տեղափոխվեն համապատասխան բուժհաստատություն։ Անդրադառնալով Օսիպյանի բժշկական զննությունից հրաժարվելուն՝ փաստաբանը նշեց, որ դա ևս բողոքի ձև է։
Նա նաև ասաց, որ քաղհասարակության մեկ տասնյակ ներկայացուցիչներ երաշխավորագրեր են ներկայացրել Օսիպյանի ազատ արձակման պահանջով։ Փաստաբանի խոսքով՝ Վերաքննիչ դատարանում ներկայացված բողոքի շրջանակում իրենք ակնկալում են խափանման միջոցի վերացում կամ մեղմացում։
Օրերս ԱԽ քարտուղար Արմեն Գրիգորյանը, պատասխանելով Արթուր Օսիպյանի վերաբերյալ Factor TV-ի հարցին, նշել էր, որ ծանոթ են խնդրին, աշխատում են այդ ուղղությամբ և հույս ունեն, որ լուծում կգտնվի։
Հիշեցնենք, որ Արաբկիրում «Քաղաքացիական պայմանագիր» կուսակցության քարոզարշավի ժամանակ միջադեպ էր տեղի ունեցել Նիկոլ Փաշինյանի և Արթուր Օսիպյանի միջև, որից հետո Օսիպյանը ձերբակալվեց, ապա երկու ամսով կալանավորվեց։ Արցախցի գործիչը ձերբակալման օրվանից հացադուլ է հայտարարել։ Փաշինյանը Օսիպյանին «փախած» էր անվանել։
Հացադուլը դադարեցնելու հորդորներին ի պատասխան՝ Օսիպյանը հայտարարել էր, որ կդադարեցնի այն ժամանակ, երբ Փաշինյանը ներողություն խնդրի իրենից։ Փաշինյանը մայիսի 28-ին, պատասխանելով Factor TV-ի հարցին, արդյոք պատրաստվում է ներողություն խնդրել Արթուր Օսիպյանից, հայտարարեց՝ նա՛ պետք է ներողություն խնդրի։ Քաղաքացիական հասարակության մի շարք ներկայացուցիչներ ու իրավապաշտպաններ հայտարարում են, որ Օսիպյանի կալանավորման հիմքեր չկան և որ նա քաղբանտարկյալ է:
Արփի Հակոբյան
