ՆԳ նախարարի տեղակալը` ընտրությունների օրը տեղի ունեցած միջադեպերի մասին․ ՏԵՍԱՆՅՈՒԹ

Ներքին գործերի նախարարի տեղակալ Արմեն Մկրտչյանը հայտարարել է, որ հունիսի 7-ի ընտրությունների ընթացքում արձանագրված հնարավոր իրավախախտումների վերաբերյալ շուրջ 100 հաղորդում է փոխանցվել Քննչական կոմիտե։

Անդրադառնալով ընտրությունների օրվա աշխատանքներին՝ Մկրտչյանն ասել է, որ ՆԳ նախարարությունում և Ոստիկանությունում ձևավորվել էին շտաբներ և աշխատանքային խմբեր՝ հասարակական կարգն ապահովելու նպատակով։ Նրա խոսքով՝ ընտրություններն անցել են ազատ, արդար և թափանցիկ պայմաններում, սակայն միաժամանակ իրականացվել է հնարավոր իրավախախտումների մշտադիտարկում։

«Արձանագրել ենք մի շարք դեպքեր։ Դրանց մի մասը դեռ ստուգման փուլում է, իսկ մի մասը ներկայացվել է Քննչական կոմիտե»,- նշել է նա։

Լրագրողների հարցին, թե քանի միջադեպ և քանի քրեական վարույթ է արձանագրվել, Մկրտչյանը պատասխանել է, որ վարույթների ճշգրիտ թվի վերաբերյալ պետք է դիմել Քննչական կոմիտեին, սակայն ՆԳՆ-ի կողմից շուրջ 100 հաղորդում արդեն փոխանցվել է այդ կառույցին։

Արձագանքելով ընդդիմության քննադատություններին, թե Ոստիկանությունը տարբեր կերպ է արձագանքում իշխանության և ընդդիմության ներկայացուցիչների մասնակցությամբ միջադեպերին, Մկրտչյանը պնդել է, որ արձանագրված բոլոր դեպքերն առանց բացառության ներկայացվել են Քննչական կոմիտե։

«Մշտադիտարկման արդյունքներով առնվազն Ձեր նշած դեպքերից մի քանիսը ես ինքս հիշում եմ, որոնք արձանագրվել և ներկայացվել են Քննչական կոմիտե։ Բոլորով ներկայացվել են»,– ասել է նա։

Տեխնիկական բնույթի խախտումների վերաբերյալ հարցին ի պատասխան՝ Մկրտչյանը նշել է, որ հնարավոր են եղել առանձին դեպքեր, օրինակ՝ ընտրացուցակների հետ կապված խնդիրներ, սակայն դրանք, նրա գնահատմամբ, էական չեն եղել և օպերատիվ կերպով պարզաբանվել են։

Նա նաև ընդգծել է, որ ընտրությունների օրը ակտիվ աշխատել է Միգրացիայի և քաղաքացիության ծառայությունը, իսկ մնացած հարցերի վերաբերյալ քաղաքացիները կարող են դիմել պատկան մարմիններին և ստանալ պատասխաններ։

Մանրամասները` տեսանյութում։