Քվեարկությունը ցույց է տալիս Եվրոպայի հետ ՀՀ-ի ավելի սերտ կապերին՝ չնայած Ռուսաստանի կողմից աննախադեպ միջամտությանն ու ճշմանը․ ԵՄ-ն հայտարարություն է տարածել

Եվրոպական Միությունը շնորհավորում է Հայաստանի Հանրապետության քաղաքացիներին խորհրդարանական ընտրություններում քվեարկելու իրենց ինքնիշխան ժողովրդավարական իրավունքն իրացնելու համար և բարձր է գնահատում քաղաքացիական մասնակցության բարձր մակարդակը։ Քվեարկությունը ցույց է տալիս Հայաստանի ամուր  հանձնառությունը ժողովրդավարությանը, խաղաղությանը և տարածաշրջանում համագործակցության ընդլայնմանը, ինչպես նաև Եվրոպայի հետ ավելի սերտ կապերին։ Այս մասին ասվում է ՀՀ-ում հունիսի 7-ին անցկացված խորհրդարանական ընտրությունների վերաբերյալ ԵՄ անունից բարձր ներկայացուցիչ Կալա Կալլասի կողմից տարածված հայտարարության մեջ։

Նշվում է, որ ԵԱՀԿ/ԺՀՄԻԳ դիտորդական առաքելության նախնական եզրակացությունների համաձայն՝ չնայած քարոզարշավը խիստ բևեռացված էր՝ ընտրությունները կառավարվել են ներառական եղանակով, առաջարկվել են հստակ քաղաքական այլընտրանքներ և լավ կազմակերպված են եղել՝ ամուր իրավական շրջանակի ներքո։

«Ընտրարշավը և քվեարկությունը տեղի են  ունեցել Ռուսաստանի կողմից աննախադեպ միջամտության, ճնշման և անընդհատ հիբրիդային հարձակումների համատեքստում, այդ թվում՝ տնտեսական հարկադրանքի միջոցառումների միջոցով, որոնք նպատակ ունեին խաթարել ժողովրդավարական գործընթացը և հրահրել բևեռացում։ Այնուամենայնիվ, ընտրությունները արտացոլում են Հայաստանի ժողովրդավարական դիմակայնությունը և առաջընթացը բարեփոխումների ճանապարհին։ Դրանք նաև ընդգծեցին հայ ժողովրդի հավատարմությունը եվրոպական արժեքներին, խաղաղ քաղաքական մասնակցությանը և կայուն, անվտանգ և բարգավաճ ապագայի ձգտմանը»,- ասվում է հայտարարության մեջ։

ԵՄ-ն հաշվի է առնում Հայաստանի ընտրական իշխանությունների կողմից հրապարակված նախնական արդյունքները, որոնք ցույց են տալիս վարչապետ Նիկոլ Փաշինյանի «Քաղաքացիական պայմանագիր» կուսակցության հստակ առավելությունը, ասվում է հայտարարությունում։

«Մենք կոչ ենք անում բոլոր քաղաքական դերակատարներին հարգել քվեարկության արդյունքները, ժողովրդավարական ընթացակարգերը և օգտագործել իրավական մեխանիզմները՝ ընտրական ցանկացած բողոք քննարկելու համար»,- ընդգծվում է հայտարարությունում։

Նշվում է, որ ԵՄ-ն ամուր կանգնած է Հայաստանի և նրա ժողովրդի կողքին ու անսասան է մնում իր հանձնառության մեջ՝ աջակցելու Հայաստանին ժողովրդավարական ճանապարհին և խորացնելու գործընկերությունը։

«Մենք անհամբեր սպասում ենք շարունակել մեր սերտ համագործակցությունը Հայաստանի ապագա կառավարության և խորհրդարանի հետ՝ իրականացնելու նրանց համապարփակ բարեփոխումների օրակարգը, խթանելու տարածաշրջանային խաղաղությունը, տնտեսական աճը և կապակցվածությունը՝ նպատակ ունենալով ամրապնդել Հայաստանի ինքնիշխանությունը, դիմադրողականությունը, ժողովրդավարությունը և բարգավաճումը»,- ասվում է ԵՄ հայտարարությունում։

Թարգմանությունը՝ Էմմա Չոբանյանի