Վճռաբեկ դատարանի որոշման հետևանքով քաղաքացիներն այսօր քաշքշուկի մեջ են եղել՝ ընտրելու իրենց իրավունքն իրացնելու համար

Հունիսի 5-ին, այսինքն՝ ընտրություններից ընդամենը երկու օր առաջ Վճռաբեկ դատարանը որոշել է, որ ընտրողների ցուցակում ժամանակավոր ընդգրկվելու պահանջը (հաշվառում չունեցող անձի կողմից) չի հանդիսանում ցուցակի ճշգրտման վեճ, այլ վերաբերում է ընտրական իրավունքի պաշտպանությանը և բխում է հանրային իրավահարաբերությունից։ Հետևաբար, գործը ենթակա է քննության վարչական դատարանի կողմից, այլ ոչ թե ընդհանուր իրավասության քաղաքացիական դատարանի։ Նախկինում այս գործերը քննվել են քաղաքացիական դատարանում, ընդ որում՝ ընտրությունների օրը դատարան դիմած քաղաքացիների գործերը մոտ մեկ ժամվա ընթացքում քննվել են, և նրանք հնարավորություն են ունեցել իրացնելու ընտրելու իրենց իրավունքը։

Ընտրություններից ընդամենը երկու օր առաջ, փաստացի փոխելով խաղի կանոնները, Դատական իշխանությունը քաղաքացիներին պատշաճ կերպով չի իրազեկել դրա մասին։ Իսկ Միգրացիայի և քաղաքացիության ծառայություն միայն այսօր է այդ մասին իրազեկող տեսանյութ հրապարակել։ Արդյունքում կան քաղաքացիներ, որոնց դիմել են քաղաքացիական դատարան, ապա մերժում ստանալուց հետո, դիմել Վարչական դատարան, որտեղ անգամ դիմումի օրինակելի ձև առկա չէ։ Արդյունքում քաղաքացիներից ոմանց դիմումները մերժվել են՝ պատշաճ ձևով ներկայացված չլինելու պատճառով։ Կան դեպքեր, երբ քաղաքացիները վաղ առավոտից սկսելով գործընթացը, այդպես էլ հնարավորություն չեն ունեցել մասնակցելու ընտրություններին՝ այսպիսիով զրկվելով ընտրելու իրենց իրավունքից։

Նշենք, որ Դատական դեպարտամենտի վերջին տվյալներով՝ 07.06.2026 թվականին ժամը 20:00-ի դրությամբ մուտքագրված գործերի քանակի պատկերը հետևյալն է

Արմավիրի մարզի առաջին ատյանի ընդհանուր իրավասության դատարան՝ 3 դատական գործ՝ ընտրողների ցուցակում ընդգրկելու պահանջի մասին:

Շիրակի մարզի առաջին ատյանի ընդհանուր իրավասության դատարան՝ 11 դատական գործ՝ ընտրողների ցուցակում ընդգրկելու պահանջի մասին:

Կոտայքի մարզի առաջին ատյանի ընդհանուր իրավասության դատարան՝ 6 դատական գործ՝ ընտրողների ցուցակում ընդգրկելու պահանջի մասին:

Գեղարքունիքի մարզի առաջին ատյանի ընդհանուր իրավասության դատարան՝ 4 դատական գործ՝ ընտրողների ցուցակում ընդգրկելու պահանջի մասին:

Արագածոտնի մարզի առաջին ատյանի ընդհանուր իրավասության դատարան՝ 1 դատական գործ՝ ընտրողների ցուցակում ընդգրկելու պահանջի մասին:

Լոռու մարզի առաջին ատյանի ընդհանուր իրավասության դատարան՝ 1 դատական գործ՝ ընտրողների ցուցակում ընդգրկելու պահանջի մասին:

Երևան քաղաքի առաջին ատյանի ընդհանուր իրավասության քաղաքացիական դատարան՝ 54 դատական գործ, Վարչական դատարան՝ 44 դատական գործ:

Մինչ այդ Դեպարտամենտը 18։40-ի դրությամբ էր տվյալներ հրապարակել, համաձայն որոնց՝ 07.06.2026 թվականի ժամը՝ 18:40-ի դրությամբ ՀՀ վարչական դատարանում ընտրական ցուցակներում ընդգրկվելու վերաբերյալ ստացվել է 42 հացադիմում՝ որից 15-ը վերադարձվել էր առկա թերությունների պատճառով, 3 հայց մերժվել էր, 1-ը վարույթ ընդունված էր, իսկ 23-ն ընթացքի մեջ էր։

Արաքս Մամուլյան