Դատական հայց՝ ԱԺ նախագահի դեմ․ ինչ է պահանջում Սամվել Կարապետյանն Ալեն Սիմոնյանից

«Ուժեղ Հայաստան» կուսակցության առաջնորդ Սամվել Կարապետյանը դատական հայց է ներկայացրել Ազգային ժողովի նախագահ Ալեն Սիմոնյանի դեմ։ «Դատալեքս» դատական-տեղեկատվական համակարգում առկա տեղեկատվության համաձայն՝ Կարապետյանը դատարանին խնդրում է Սիմոնյանին պարտավորեցնել հրապարակայնորեն հերքում տարածել հետևյալ բովանկադությամբ․

«Ես՝ Ալեն Ռոբերտի Սիմոնյանս, ֆեյսբուք (Facebook) և Տիկտոկ (TikTok) հարթակներում 2026 թվականի մայիսի 19-ին  «Ուժեղ Հայաստան» դաշինքի առաջնորդ Սամվել Կարապետյանի հասցեին տարածել եմ հետևյալ տեղեկությունը՝ «իրավապահները պետք է իրենց գնահատականը տան, թե ո՞նց է ստացվում, որքա՞ն իրավական է արտաքին այլ երկրի հետախուզական ծառայության աշխատակցի կողմից Հայաստանի Հանրապետությունում կուսակցություն հիմնելը և քաղաքականության մեջ մտնելը»:

Հայտնում եմ, որ այդ տեղեկությունն ամբողջությամբ կեղծ է, չի համապատասխանում իրականությանը և դրանով ես զրպարտել եմ Սամվել Կարապետյանին»։

Կարապետյանը պահանջել է հերքումը հրապարակել Ալեն Սիմոնյանին պատկանող ֆեսբուքյան և տիկտոկյան էջերում՝ «Հերքում «Ուժեղ Հայաստան» դաշինքի առաջնորդ Սամվել Կարապետյանի վերաբերյալ իմ կողմից 19.05.2026թ. հրապարակված տեսանյութում հրապարակված զրպարտություն պարունակող տեղեկությունների վերաբերյալ» խորագրի ներքո տեղադրված տեսանյութի միջոցով։

Բացի այդ, ըստ հայցադիմումի՝ հերքումը նշված հարթակներում պետք է պահպանել այնքան ժամանակ, քանի դեռ հրապարակված են մնում համապատասխան հերքվող տեղեկությունը պարունակող տեսանյութերը, բայց ոչ պակաս քան հերքումը հրապարակելուց հետո մեկ ամիս ժամկետով: Կարապետյանը Ալեն Սիմոնյանից պահանջում է նաև 6.000.000 ՀՀ դրամ՝ որպես զրպարտության համար փոխհատուցում, ինչպես նաև դատական ծախսի գումարը՝ կազմված պետական տուրքի և փաստաբանի խելամիտ վարձատրության գումարներից։

Հիշեցնենք, որ մայիսի 19-ին ռուսական The insider պարբերականը գրել է այն մասին, որ  «Սամվել Կարապետյանի անձնագրային գործում որպես աշխատանքի վայր նշված է եղել ФСБ-ի տեղեկատվական կենտրոնը»։ Դրանից հետո հրապարակման մասին խոսել է Ալեն Սիմոնյանը,  և նրա խոսքը, փաստորեն, առիթ է դարձել Սամվել Կարապետյանի կողմից դատական հայց ներկայացնելու։

«Դատալեքս»-ում առկա տեղեկատվության համաձայն՝ գործը մակագրվել է դատավոր Վահագն Թորոսյանին։

Արաքս Մամուլյան