Նիկոլ Փաշինյանը քարոզարշավի ընթացքում քաղաքացուն գորգ խոստացավ. ՏԵՍԱՆՅՈՒԹ

ՀՀ վարչապետի պաշտոնակատար Նիկոլ Փաշինյանն իր թիմակիցների հետ այսօր նախընտրական քարոզարշավն սկսեց Արագածոտնի մարզի Թալին քաղաքից, ապա շարժվեց դեպի Շիրակի մարզի Մարալիկ քաղաք, որից հետո կարճ կանգառ ունեցավ Պեմզաշեն գյուղում:

Վարչապետի պաշտոնակատարին ողջունելու համար հավաքված պեմզաշենցիներից մի քանիսն այդ կարճ րոպեների ընթացքում հասցրեցին բարձրաձայնել իրենց հուզող խնդիրների մասին: Մի կին, օրինակ, խոսեց մանկավարժների ցածր աշխատավարձերից: Վարչապետի պաշտոնակատարը լսեց մանկավարժին, ապա խոստացավ անպայման այդ հարցով զբաղվել: Այնուհետև Փաշինյանին մոտեցան երեխաներ, խնդրեցին նկարվել և այլն:

Այս ամենին զուգահեռ «Իմ քայլը» դաշինքի առաջնորդին դիմեց պեմզաշենցի մի տղամարդ՝ ասելով. «Պեմզաշենի համար մի հատ օլիմպիական գորգ է պետք, մարզումներ անենք»:

«Գորգի խնդի՞ր է, միայն գո՞րգ»,- հետաքրքրվեց Փաշինյանն, ապա դրական պատասխան ստանալուց հետո խոստացավ. «Կլուծենք, Նաիրի՛, ստեղ…»:

Տեղեկացնենք, որ Նաիրի Սարգսյանը, ում Փաշինյանը հանձնարարեց քաղաքացու խնդրած գորգի հարցով զբաղվել, վարչապետի պաշտոնակատարի օգնականն է:

Ընտրական օրենսգիրքը հստակ սահմանում է՝ նախընտրական քարոզչության ժամանակ, ինչպես նաև քվեարկության նախորդ և քվեարկության օրը թեկնածուներին, կուսակցություններին, կուսակցությունների դաշինքներին արգելվում է անձամբ կամ նրանց անունից կամ որևէ այլ եղանակով ընտրողներին անհատույց կամ արտոնյալ պայմաններով տալ (խոստանալ) դրամ, սննդամթերք, արժեթղթեր, ապրանքներ կամ մատուցել (խոստանալ) ծառայություններ: Այն բարեգործական կազմակերպությունները, որոնց անվանումները կարող են նմանեցվել (ասոցացվել) կուսակցությունների, կուսակցությունների դաշինքների անվանումներին, թեկնածուների անուններին, նախընտրական քարոզչության ժամանակ բարեգործություն չեն կարող իրականացնել այն համայնքներում, որտեղ անցկացվում են ընտրություններ, որոնց մասնակցում են այդ թեկնածուները, կուսակցությունները, կուսակցությունների դաշինքները կամ նրանց առաջադրած թեկնածուները:

Նշենք, որ անցած տարի խորհրդարանական ընտրություններին այդ առումով քննադատության թիրախում էր մասնավորապես «Ծառուկյան» դաշինքի առաջնորդ Գագիկ Ծառուկյանը, որը բացահայտ խոստումներ էր տալիս քաղաքացիներին: Բանը հասավ նրան, որ Կենտրոնական ընտրական հանձնաժողովը հանդես եկավ հայտարարությամբ՝ կոչ անելով քարոզարշավի ընթացքում զերծ մնալ դրամական և նյութական խոստումներից։

Մանրամասները՝ տեսանյութում:

Շողիկ Գալստյան