Իոաննիսյանը չզրկվեց դիտորդական հավատարմագրումից, սակայն պարտավորվեց վերացնել Մարուքյանի մասին գրառումները

«Անկախ դիտորդ» դաշինքի կազմում ընդգրկված «Իրազեկ քաղաքացիների միավորում» հասարակական կազմակերպությունը և ներկայացուցիչ Դանիել Իոաննիսյանը չեն զրկվի դիտորդական հավատարմագրումից։ Կենտրոնական ընտրական հանձնաժողովը երեկ ավելի քան 2 ժամ նիստ գումարելուց, ապա մինչև գիշեր հարցը քննելուց հետո, թեև որոշում է կայացրել մերժել «Լուաավոր Հայաստան» կուսակցության ղեկավար Էդմոն Մարուքյանի դիմումը, այնուամենայնիվ ընդգծել է՝ հրապարակումը խնդրահարույց է։

«Չնայած Կենտրոնական ընտրական հանձնաժողովը գնահատում է հրապարակումը խնդրահարույց, այնուամենայնիվ, այն որպես եզակի դեպք բավարար չէ և չի բավարարում այն շեմը, որի պատճառով կարելի կլիներ ուժը կորցրած ճանաչել դիտորդի կամ կազմակերպության գրանցումը: Դիտորդի կողմից այդպիսի հրապարակումների միտումը, կրկնությունը կամ նույն կազմակերպության տարբեր դիտորդների կողմից թեկուզ եզակի խնդրահարույց հրապարակումների պարագայում Կենտրոնական ընտրական հանձնաժողովը կարող է այն դիտարկել որպես դիտորդի կողմից քաղաքական չեզոքության խախտում կամ տարբեր դիտորդների կողմից համատեղ խմբային քաղաքական չեզոքության խախտում և կարող է առաջ բերել կազմակերպության հավատարմագրումը ուժը կորցրած ճանաչելու հարց:

Հիմք ընդունելով վերոգրյալը և ղեկավարվելով ընտրական օրենսգրքի 47-ից 49-րդ հոդվածներով, Կենտրոնական ընտրական հանձնաժողովը որոշեց. «Անկախ դիտորդ» դաշինքի անդամ «Իրազեկ քաղաքացիների միավորում» հասարակական կազմակերպության հավատարմագրումը ուժը կորցրած ճանաչելու հիմքերը բավարար չեն»։ Ոորոշման նախագիծն ընթերցել է ԿԸՀ նախագահ Վահագն Հովակիմյանը, որը միաձայն ընդունվել է հանձնաժողովի անդամների կողմից։

Բացի այդ, Իոաննիսյանը պարտավորվել է Էդմոն Մարուքյանի վերաբերյալ հրապարակած և տարածած նյութերը, դրանց վերաբերյալ գրառումները վերացնել։

Նիստի ավարտից հետո՝ լրագրողների հետ ճեպազրույցի ժամանակ Մարուքյանը հայտնել է, որ ԿԸՀ որոշումը չեն բողոքարկի, եթե Իոաննիսյանը հեռացնի գրառումները.

«Ակնկալում եմ, որ Դանիել Իոաննիսյանը կհեռացնի և ԿԸՀ-ն հետևողական կլինի այդ հարցում։ Մենք չենք կարող քարոզարշավը թողնել ու այս հարցը քննել։ Մենք նպատակ չունենք որևէ ՀԿ-ի կամ դիտորդական առաքելության վնաս հասցնելու, մեր նպատակն է, որ եթե այդ առաքելության մեջ կան անձինք, որոնք քարոզչություն կամ հակաքարոզչություն են անում, ապա նրանք պետք է զրկվեն հավատարմագրումից»։

Հիշեցնենք՝ ըստ կուսակցության և ընտրական ցուցակը գլխավորող Էդմոն Մարուքյանի՝ Իոաննիսյանը, հիմնվելով «սունկ» կայքերից մեկի հրապարակման վրա, թիրախավորել և փաստացի հակաքարոզչություն է իրականացրել իր դեմ, ինչը դիտել է ավելի քան 100 հազար օգտատեր։ «Լուսավոր Հայաստան»-ը պնդում է, որ դիտորդական առաքելություն իրականացնող սուբյեկտը դրանով կոպտորեն խախտել է Ընտրական օրենսգրքով սահմանված վարքագծի կանոնները՝ չպահպանելով քաղաքական չեզոքության և քարոզչություն կամ հակաքարոզչություն չիրականացնելու իմպերատիվ պահանջը: Երեկ ԿԸՀ-ում իր ելույթում Իոաննիսյանը հայտարարել էր, որ ինքն ընդամենը զարմանք է արտահայտել, ինչը չի կարող դիտարկվել որպես քարոզչություն կամ հակաքարոզչություն։

Հավելենք նաև,  որ Դանիել Իոաննիսյանը գրառմամբ պատասխանել է ԿԸՀ որոշմանը․

Ռոզա Վարդանյան