18.12.2025 | 22:49
Համբերությունը սպառվում է. Թուրքիան զգուշացրել է Սիրիայի քրդական ուժերին
8 ամսում 30 տարվա խնդիրները լուծել հնարավոր չէ, բայց հնարավոր է ցույց տալ, թե ինչպես պետք է Հայաստանը զարգանա․ Արթուր Բաղդասարյան
Քաղաքականություն
26.11.2018 | 17:01
«Օրինաց երկիր» կուսակցության նախագահ Արթուր Բաղդասարյանը վստահաբար հայտարարում է՝ իրենք ոչ սև են, ոչ սպիտակ, իրենք ՕԵԿ են և ըստ Բաղդասարյանի՝ աշխարհում կան լիքը գույներ, ուստի պետք է սիրել աշխարհը, սիրել գույները և սիրել երկիրը:
Նոյմբերի 26-ին՝ քարոզարշավի առաջին օրն այս տեսակետը հայնեց Բաղդասարյանը՝ վստահեցնելով, որ իրենք փորձելու են շիտակ, քաղաքական մրցակցային պայմաններում արժանանալ ժողովրդի վստահության քվեին:
ՕԵԿ առաջնորդը նշեց, որ հեղափոխությունից հետո չի տեսնում երկրի զարգացման ճանապարհը, տեսլականը, դրա համար էլ մասնակցում են ընտրություններին, որպեսզի ներկայացնեն ժողովրդին իրենց ծրագրերն ու գաղափարները:
«Տեղի է ունեցել հեղափոխություն, 8 ամիս անցել է: 8 ամսում 30 տարվա խնդիրները լուծել հնարավոր չէ, բայց հնարավոր է ցույց տալ, թե ինչպես պետք է Հայաստանը զարգանա»,- ասաց Բաղդասարյանը։
Նշենք, որ «Օրինաց երկիր» կուսակցությունն իր քարոզարշավը մեկնարկեց Երևանի Սուրբ Աննա եկեղեցու բակում մոմ վառելով և ՕԵԿ նախագահը բոլորին կոչ արեց վառել «հաջողության» մոմեր:
«Այսօրվա այս մոմավառությունը հենց այն նպատակը ունի, որ մենք ազգովի միշտ պետք է ամուր կառչած մնանք մեր ակունքներից»,- ասաց նա:
