09.06.2026 | 11:02
Վահագն Ալեքսանյանի ճեպազրույցը՝ ՈՒՂԻՂ
Տարվա կտրվածքով Հայաստան պետք է մտնի 2-3 մլրդ դոլար․ Միքայել Մելքումյանը ներկայացրեց ԲՀԿ-ի նախընտրական ծրագիրը
Քաղաքականություն
26.11.2018 | 16:04
«Բարգավաճ Հայաստան» կուսակցությունն արտահերթ խորհրդարական ընտրություններին ներկայացնում է 36 քայլից բաղկացած նախընտրական ծրագիր, որի հիմքում դրված է երկու հիմնական սկզբունք: «Առաջինը՝ նախորդ մեր բոլոր ծրագրերի նկատմամբ հետևողական ենք լինելու: Երկրորդ՝ հետհեղափոխական շրջանում, երբ հանրապետությունում նոր իրավիճակ է ստեղծվել, պետք է համարժեք արձագանք»,- այսօր հրավիրված մամուլի ասուլիսի ժամանակ կուսակցության ծրագիրը ներկայացնելիս նշեց ԱԺ փոխնախագահ, ԲՀԿ-ական պատգամավորի թեկնածու Միքայել Մելքումյանը։
Վերջինիս խոսքով՝ երկրի տնտեսական զարգացման հիմնախնդիրներին չպետք է հակադրել մարդկանց արդիական սոցիալական խնդիրների լուծումը, երբ ասում ենք՝ թոշակ, աշխատավարձ բարձրանա, երբեք չպետք է հակադրենք այն մոտեցմանը, թե դե ցույց տվեք՝ որտեղից այդ գումարները, դրանք պետք է հայթայթվեն։
«Մենք գիտենք, թե երկիրը ինչպես պետք է այս ծանր սոցիալ-տնտեսական վիճակից դուրս բերել»,- ասաց նա:
Միքայել Մելքումյանը նաև ընդգծեց, որ իրենց նախընտրական ծրագրի հաջորդ կետն այն է, որ քաղաքական հեղափոխությանը պետք է հաջորդի տնտեսական հեղափոխություն։
«Ոչ թե պետք է խոսել 3-4 տոկոս աճի մասին, այլ պետք է երկնիշ տնտեսական աճ ունենանք: Տարվա կտրվածքով Հայաստան պետք է մտնի 2-3 մլրդ դոլար»,- ասաց նա։
Ըստ ԲՀԿ-ական պատգամավորի թեկնածուի՝ իրենց նախընտրական ծրագրի հաջորդ կետը տեխնոլոգիական հեղափոխությունն է։
«Պետք է ապահովենք ճյուղային կառուցվածքի կտրուկ փոփոխություն տնտեսությունում: Այսինքն՝ ավանդական արդյունաբերության ճյուղերը մնան իրենց տեղում, բայց կարողանանք տեխնոլոգիական կառուցվածքը փոխել»,- ասաց նա՝ որպես կուսակցության նախընտրական ծրագրի հաջորդ կետը առանձնացնելով թոշակների և աշխատավարձերի բարձրացման հարցը։
«Նվազագույն թոշակի և աշխատավարձի չափ չենք գրել, միայն նշել ենք, որ արժանապատիվ կենսապահովման չափ պետք է ապահովվի»,- ասաց նա:
