Արայիկ Խանդոյանի եղբայրը դուրս է եկել «Սասնա ծռերի» ցուցակից. կուսակցությունից պատճառները չեն նշում

Արցախի հերոս Արայիկ Խանդոյանի եղբայրը՝ Արարատ Խանդոյանը, ինքնաբացարկ է հայտարարել և հրաժարվել որպես թեկնածու մասնակցել դեկտեմբերի 9-ին կայանալիք արտահերթ խորհրդարանական ընտրություններին: Այս մասին տեղեկանում ենք Կենտրոնական ընտրական հանձնաժողովի կայացրած որոշումից:

Արարատ Խանդոյանը ինքնաբացարկի դիմում ներկայացրել է նոյեմբերի 21-ին, որը ԿԸՀ-ն հաստատել է նոյեմբերի 24-ին: Խանդոյանը «Սասնա Ծռեր» համահայկական կուսակցության նախընտրական ցուցակի 41-րդ համարն էր:

Նա որպես ռեյտինգային թեկնածու առաջադրված էր նաև թիվ 7 ընտրատարածքում՝ Արագածոտնի մարզում: Արարատ Խանդոյանը ծնունդով Արագածոտնի մարզի Ծաղկահովիտ գյուղից է:

Ինքնաբացարկի շուրջ փորձեցինք մեկնաբանություն ստանալ Արարատ խանդոյանից, բայց նա մեր հեռախոսազանգերին չպատասխանեց: «Սասնա Ծռեր» կուսակցության մամուլի խոսնակ Վահագն Ավագյանը մեզ հետ զրույցում Խանդոյանի ինքնաբացարկի պատճառները չնշեց:

«Մենք հստակ պատճառ այս պահին չգիտենք, բայց կարծում ենք, որ ժամանակն է, որպեսզի հանրության ուշադրությունը գրավեն ոչ թե անձերի շուրջ իրադարձություններն, այլ՝ քաղաքական ուժերի ծրագրերը: Մարդիկ պետք է ընտրեն ծրագրերը, ոչ թե անձանց: «Սասնա Ծռերն» ասում են՝ եկեք խոսենք ծրագրերից»,- նշեց կուսակցության մամուլի խոսնակը:

Հիշեցնենք, որ 2018 թվականի հուլիսի 16-ին Շիրակի մարզի ընդհանուր իրավասության դատարանի դահլիճից Խանդոյանը վաղաժամկետ ազատ արձակվեց:
2016-ի հուլիսին Երևանում «Սասնա ծռեր» զինված խմբի կողմից Ոստիկանության պարեկապահակետային ծառայության գնդի տարածքի գրավման օրերին զանգվածային անկարգություններին մասնակցելու մեջ մեղադրվող Արարատ Խանդոյանը դատապարվել էր 3,5 տարվա ազատազրկման:

Հայկ Վարդանյան