13.06.2026 | 00:58
ԱԱ-2026․ Կանադան խուսափեց պարտությունից Բոսնիա և Հերցեգովինայի դեմ խաղում․ ՏԵՍԱՆՅՈՒԹ
Հեղափոխություն տեղի ունեցավ, որովհետև ժողովուրդը զրկված էր ձայնի իրավունքից. Նիկոլ Փաշինյան. ՏԵՍԱՆՅՈՒԹ
Քաղաքականություն
26.11.2018 | 11:31
Քիչ առաջ Արագածոտնի մարզի Թալին քաղաքում մեկնարկեց «Իմ քայլը» դաշինքի նախընտրական քարոզարշավը:
«Իմ քայլը» դաշինքի նախընտրական շտաբի ղեկավար Սուրեն Պապիկյանը կարճ ելույթից հետո խոսքը փոխանցեց վարչապետի պաշտոնակատար Նիկոլ Փաշինյանին, որին, ի դեպ, ուղեկցում էր նաև կինը՝ Աննա Հակոբյանը:
Փաշինյանը նախ դիմեց թալինցիներին՝ նկատելով, որ Թալինը վերջին տասնամյակների քաղաքական պրոցեսներում եղել է ամենաակտիվ քաղաքներից մեկը: «Դուք մասնակցել եք հեղափոխության բոլոր փորձերին: Մենք իրար հետ ենք մասնակցել, բայց ամեն անգամ ձախողվել ենք: Բայց 2018 թվականին դուք հաղթեցիք կոռումպացված իշխանությանը: Դուք ձեր ասածն արեցիք, դուք հաղթեցիք, դուք ամեն անգամ հաղթելու եք»,- ասաց վարչապետի պաշտոնակատարը, ապա հայտարարեց՝ եկել են կոչ անելու այս ընտրություններում վստահության քվե տան «Իմ քայլը» դաշինքին. « Բայց մեր նպատակը հետևյալն է , որ ՀՀ-ում տեղի ունենալիք բոլոր ընտրություններում՝ անկախ նրանից, թե որ ուժն առաջին տեղը կզբաղեցի այդ ընտրություններում, հաղթողը պետք է լինի ՀՀ քաղաքացին, նրա քվեով է որոշվելու խորհրդարանում որ ուժն է լինելու առաջինը, երկրորդը, երրորդը, ոչ թե լցոնումներով, ծեծ ու ջարդով, այլ ՀՀ քաղաքացու ազատ կամարտահայտմամբ»:
Նիկոլ Փաշինյանի համոզմամբ՝ հեղափոխության ամենամեծ արդյունքն այն է, որ Հայաստանից վերացվեց հեղափոխությունների անհրաժեշտությունը:
«Դուք ձեր հեղափոխությունը կարող եք անել ձեր մեկ քվեաթերթիկի միջոցով: Հեղափոխություն տեղի ունեցավ, որովհետև ժողովուրդը զրկված էր ձայնի իրավունքից: Ձեր ձայնը գողացված էր, դուք ցանկացած ընտրության ժամանակ ունեք իրավունք՝ հեղափոխության իրավունք»,- շարունակեց Փաշինյանը:
Նա նաև հայտարարեց, որ պատիվ ունի ներկայանալ թալինցիներին որպես «Իմ քայլը» դաշինքի վարչապետի թեկնածու: «Ես այսօր կանգնած եմ ձեր դիմաց և ասում եմ՝ որպես վարչապետի թեկնածու, վստահության քվե եմ ակնկալում ձեզանից»,- դիմելով հավաքվածներին՝ ասաց վարչապետի պաշտոնակատարը:
Այնուհետև սկսեց թվարկել այն փոփոխությունները, որոնք պատրաստվում են առաջիկայում իրականացնել՝ շեշտը կրկին դնելով տնտեսական հեղափոխության վրա:
Մանրամասները՝ տեսանյութում:
