«Սև ցուցակների» վերաբերյալ պնդումները չեն համապատասխանում իրականությանը․ Հանրայինից արձագանքել են հայտնիների՝ եթերում չլինելուն

Factor TV-ն օրեր առաջ անդրադարձել էր այն հայտնիներին, որոնց Հանրային հեռուստաընկերության եթերում այլևս չենք տեսնում՝ Բաբկեն Չոբանյան, Լուսինե Թովմասյան, Խորեն Լևոնյան, Նազենի Հովհաննիսյան։

Factor TV-ն գրավոր հարցմամբ դիմել էր Հանրային հեռուստաընկերությանը՝ խնդրելով պարզաբանել՝ ինչ պատճառով են հանրային այս դեմքերը հեռացել հեռուստաընկերությունից, արդյոք այդ պատճառները մասնագիտական շրջանակներում են, թե ոչ, և ինչպես է Հ1-ի ղեկավարութունը մեկնաբանում հեռուստաընկերությունում «սև ցուցակի» գոյության վերաբերյալ պնդումները։

Հանրային հեռուստաընկերության Հանրային կապերի և թվային հաղորդակցության ծառայության ղեկավար Լուսինե Թորոսյանը, ի պատասխան մեր հարցման, տեղեկացրել է, որ Բաբկեն Չոբանյանի չներգրավվելը պայմանավորված է եղել հաղորդման երկրորդ եթերաշրջանում այլ հաղորդավար ինտեգրելու խմբագրական որոշմամբ։

«Նշենք, որ նա ամբողջությամբ վարել է հաղորդման առաջին եթերաշրջանը։ Միաժամանակ, հարկ ենք համարում ընդգծել, որ Հանրային հեռուստաընկերությունում «սև ցուցակների» առկայության վերաբերյալ պնդումները չեն համապատասխանում իրականությանը: Հանրային հեռուստաընկերությունը տարբեր առիթներով և հրապարակային հարթակներում բազմիցս անդրադարձել է այդ հարցին»,- ասված է պատասխանում:

Ինչ վերաբերում է Նազենի Հովհաննիսյանին, ապա պատասխանում նշվում է, որ նրա հետ՝ որպես հաղորդավարի համագործակցությունը Հանրային հեռուստաընկերության հետ դադարեցվել է դեռևս 2012 թվականին, իսկ որպես կինոյի կրկնօրինակման բաժնի աշխատակից՝ 2018 թվականին։

«Միաժամանակ նշենք, որ 2021 թվականին նա ներգրավված է եղել Առաջին ալիքի Մեդիա ակադեմիայի շրջանակում՝ վարելով վարպետաց դաս, ինչպես նաև մասնակցել է «Առավոտ լուսո. Weekend» հաղորդմանը՝ որպես հյուր, ինչը ևս վկայում է վերոնշյալ պնդումների անհիմն լինելու մասին»,-մասնավորապես նշված է պատասխանում։

Հանրային հեռուստաընկերությունից հավաստիացրել են, որ բոլոր աշխատակիցների և գործընկերների նկատմամբ գործում են միևնույն աշխատանքային և պայմանագրային սկզբունքները, իսկ պայմանագրային դրույթների խախտման դեպքերում կիրառվում են համապատասխան աշխատանքային ընթացակարգեր՝ անկախ անձից կամ զբաղեցրած դիրքից։

«Ինչ վերաբերում է Լուսինե Թովմասյանին և Խորեն Լևոնյանին, ապա տվյալ դեպքերում հիմք են հանդիսացել բացառապես աշխատանքային և պայմանագրային կարգավորումների հետ կապված հանգամանքները: Առաջին դեպքում իրականացվել է այլ մեդիա գործունեություն՝ առանց նախնական ծանուցման և համապատասխան համաձայնեցման, ինչը նախատեսված է պայմանագրային դրույթներով։ Երկրորդ դեպքում արձանագրվել է աշխատանքային պարտականությունների չկատարում, այդ թվում՝ աշխատանքային գործընթացներին չմասնակցելու և հանձնարարականների ամբողջական չկատարման հանգամանքներ, որոնք իրենց հերթին ազդեցություն են ունեցել հեռուստաընկերության բովանդակության արտադրական գործընթացների վրա»,- նշված է պատասխանում:

Աննա Բաբաջանյան