26.07.2026 | 23:49
ՃՏՊ՝ հրդեհի բռնկմամբ․ կան զոհեր և տուժածներ
Ռուսաստանը և՛ սպառնալիք, և՛ գործընկեր․ ինչ են ցույց տալիս IRI-ի հարցման արդյունքները
Քաղաքականություն
22.05.2026 | 19:47
«Ո՞ր երկրներն են Հայաստանի համար ներկայացնում քաղաքական ամենամեծ սպառնալիքը» հարցին ի պատասխան՝ քաղաքացիների մեծամասնությունը շարունակում է նշել Ադրբեջանն ու Թուրքիան։ Այս մասին են վկայում 2026 թվականի մայիսին իրականացված Միջազգային հանրապետական ինստիտուտի (IRI) հարցման արդյունքները, որտեղ հարցվողները կարող էին ընտրել մի քանի տարբերակ։
Հարցվածների 73%-ը որպես գլխավոր քաղաքական սպառնալիք նշել է Ադրբեջանը, 58%-ը՝ Թուրքիան։ Երրորդ տեղում Ռուսաստանն է՝ 32%-ով։ Միևնույն ժամանակ, հարցվածների 6%-ը կարծում է, որ նշված երկրներից ոչ մեկը Հայաստանի համար սպառնալիք չէ, իսկ 3%-ը դժվարացել է պատասխանել կամ հրաժարվել է։
Ժամանակագրական համեմատությունը ցույց է տալիս, որ 2023 թվականի համեմատ նվազել է Ադրբեջանի և Թուրքիայի՝ որպես սպառնալիք ընկալվելու մակարդակը։ Եթե 2023-ին Ադրբեջանը որպես սպառնալիք էր դիտարկվում հարցվածների 93%-ի, իսկ Թուրքիան՝ 89%-ի կողմից, ապա այժմ այդ ցուցանիշները կազմել են համապատասխանաբար 73% և 58%։
Ըստ հետազոտության՝ Հայաստանի քաղաքացիների պատկերացմամբ երկրի կարևորագույն քաղաքական գործընկերը Ֆրանսիան է․ «ո՞ր երկրներն եք համարում Հայաստանի համար քաղաքական կարևորագույն գործընկերներ» հարցին ի պատասխան հարցվածների 39%-ը նշել է հենց այս երկիրը։ Երկրորդ տեղում Ռուսաստանն է 35%-ով, իսկ երրորդում՝ ԵՄ-ն 34%-ով։ Հաջորդում են Իրանը՝ 29%, ԱՄՆ-ը՝ 27%, Վրաստանը՝ 18% և Չինաստանը՝ 17%։ Թուրքիան որպես գործընկեր նշել է հարցվածների 4%-ը, Ադրբեջանը՝ 3%-ը։ Նույն ցուցանիշն ունի նաև Ուկրաինան։
Հետազոտության տվյալների համադրությունը ցույց է տալիս հետաքրքիր պատկեր․ որոշ երկրներ հասարակության կողմից միաժամանակ ընկալվում են և՛ որպես գործընկեր, և՛ որպես սպառնալիք։
Ամենահակասական ընկալումն ունի Ռուսաստանը։ Մի կողմից այն համարվում է Հայաստանի երկրորդ կարևորագույն քաղաքական գործընկերը՝ 35%-ով, մյուս կողմից՝ հարցվածների 32%-ը Ռուսաստանը դիտարկում է նաև որպես քաղաքական սպառնալիք։
Ի տարբերություն Ռուսաստանի՝ Ֆրանսիան և Եվրոպական միությունը հանրության կողմից ընկալվում են գրեթե միանշանակ դրական։ Ֆրանսիան գլխավորում է գործընկեր երկրների ցանկը, միայն 2%-ն է այն համարում սպառնալիք։ Նմանատիպ պատկեր է նաև ԵՄ-ի դեպքում։
Ադրբեջանն ու Թուրքիան շարունակում են ընկալվել հիմնականում որպես սպառնալիք։ Ավելի շատ որպես գործընկեր, քան սպառնալիք են ընկալվում նաև Իրանն ու ԱՄՆ-ը։
Հետազոտությունն իրականացվել է 2026 թվականի մայիսի 5-11-ը՝ հեռախոսային հարցազրույցների միջոցով։ Հարցմանը մասնակցել է Հայաստանի 1,511 մշտական բնակիչ։
Լուսանկարը գեներացված է արհեստական բանականության միջոցով
Անի Թամրազյան
