05.10.2026 | 13:51
Էստոնիան «արմատական վերախմբավորում» է սկսել՝ զորքերը տեղափոխելով ՌԴ սահմանին ավելի մոտ
107 հազար եվրո, 110․3 հազար դոլար, 10 մլն դրամ․ ինչ կա Անդրանիկ Թևանյանի հայտարարագրում
Հասարակություն
22.05.2026 | 14:44
Հունիսի 7-ի նախընտրական քարոզարշավին մասնակցող «Բարգավաճ Հայաստան» կուսակցության ընտրացուցակի 2-րդ համար, «Մայր Հայաստան» ազգային-դեմոկրատական կուսակցության վարչության նախագահ Անդրանիկ Թևանյանը 2026 թվականի ապրիլի 1-ի դրությամբ հայտարարագրել է 107 հազար եվրո, 110․3 հազար դոլար, 10 մլն դրամ կանխիկ միջոցներ և 2․3 մլն դրամ անկանխիկ գումար։ Կենտրոնական ընտրական հանձնաժողով ներկայացված գույքի և եկամուտների հայտարարագրում Թևանյանը նշել է մոտ 4․9 դրամ եկամուտ, որը «Թևանյան» ՍՊԸ-ի վերադարձրած փոխառություն է։ Այս ընկերությունը 2008-ին հիմնադրել է Անդրանիկ Թևանյանը, ապա 2021-ին փոխանցել է կնոջը՝ Էլմիրա Թևանյանին։
Նախորդ տարիներին Կոռուպցիայի կանխարգելման հանձնաժողով ներկայացրած հայտարարագրերում Թևանյանը 2024 և 2025 թվականների համար որևէ եկամուտ չի ներկայացրել։ Վերջին անգամ նա աշխատավարձ ստացել է 2023-ին՝ Ազգային ժողովից՝ 4․2 մլն դրամ։ Թևանյանը, հիշեցնենք, պատգամավորական մանդատը վայր է դրել 2023-ին՝ սեպտեմբերին Երևանի ավագանու ընտրություններին մասնակցելու համար։
2023-ի համեմատ 2026-ին նրա կանխիկ գումարը նվազել է 11․3 մլն դրամով, 3700 դոլարով և 1600 եվրոյով։
Թևանյանը 2019-ին գնել է բնակարան Երևանի Կենտրոնում (մակերեսը՝ 143․6 քմ), 2020-ին՝ ավտոտնակ (21 քմ)։ 2022-ին նա ժառանգություն է ստացել հողամաս Բյուրեղավանում (մակերեսը՝ 525 քմ):
Թևանյանը 2019-ին գնել է 2018-ի արտադրության HONDA CR-V մակնիշի ավտոմեքենա։
Հիշեցնենք, որ ՀՀ քննչական կոմիտեն պետական դավաճանության և լրտեսության հոդվածներով քրեական վարույթ է նախաձեռնել՝ հիմք ընդունելով ԱԱԾ-ից ստացված հաղորդումը, ըստ որի՝ Անդրանիկ Թևանյանը, հավաքագրվելով օտարերկրյա հատուկ ծառայությունների կողմից, գաղտնի տեղեկություններ է փոխանցել արտասահմանյան կառույցի ներկայացուցչին՝ 622 հազար ԱՄՆ դոլար գումարի դիմաց:
Գայանե Խաչատրյան
